ಮನದೊಳಗೆ ಹಾದುಹೊದ ಭಾವನೆಗಳ ಶಬ್ದರೂಪ...

2011-11-15T10:07:00.000-08:00

ಗೆಳತಿ.... Happy Birth Day :)

ಮನದೊಳಗಿನ ಮುದ್ದು ಗೆಳತಿ ...

ಹೇಳ ಹೊರಟರೆ ಅರ್ಧಕ್ಕೆ ತುಂಡಾಗುವ ಮಾತು..

ಕಣ್ಣ ಭಾಷೆ ತಿಳಿಯೇ ಎನ್ನೋಣವೆಂದರೆ....

ಜೊತೆ ಕೂತು ಹರಟಿ ದಿನಗಳೆಷ್ಟೋ ಕಳೆದು ಹೋಯ್ತು...

ಗೆಳತಿ just ಒಂದು message ನ ಅಂತರ... ಹೆಚ್ಚೇನಿಲ್ಲ ಬಿಡು ..

ಅಂತರಾಳ ಅರಿತ ಈ ಬಂಧ ದೃಢವಾಗಿರುವಾಗ

ಅಂತರ ಇನ್ನೇನು ತಾನೇ ಮಾಡೀತು??

ಜೊತೆ ಕಳೆದದ್ದು ಕೆಲವೇ ದಿನಗಳು...

ಕಲಿತದ್ದು..ಕಲೆತದ್ದು ಎರಡೂ ಅಪಾರ...

ಆ ನಿನ್ನ ಜನ್ಮದಿನದಂದು ಇರಲಿಲ್ಲ ಅಲ್ಲಿ,

ನಿನ್ನಿಷ್ಟದ cake.. pink teddy

ಅಂಗಳದಲ್ಲಿ ಬೆಳೆದ ಚಿಗುರೆಲೆ ಪುಟ್ಟ ಹೂವು..

ಇಬ್ಬನಿಯ ಸಾಲುಗಳಂತೆ ನಮ್ಮೆಲ್ಲರ ಪ್ರೀತಿ..

ಜೊತೆಗೆ ಹೀಗೆ ಗೀಚಿದ ಸಾಲು....

ಹೆಚ್ಚು ಹೇಳಲಾರೆ...ಅದು ನಿಂಗೂ ಗೊತ್ತು...

ನೆನಪಿದೆಯಾ ನೀ ಕಾಡಿಸಿದ್ದು..'ನನ್ನ್ ಬಗ್ಗೆ ಕವನ ಬರಿಯೇ' ಅಂತ..

ನನ್ನ reply: sorry i can't...

ಈಗಲೂ ಇದು ಕವನ ಎನ್ನಿಸುತ್ತಿಲ್ಲ....

ಮನದಲ್ಲಿ ಬಂದ ಸಾಲುಗಳನ್ನೆಲ್ಲ cut paste ಮಾಡಿದಂತಿದೆ....

ಇರಲಿ ನೀನಲ್ವಾ adjust ಮಾಡ್ಕೋಳೆ :)

ಕವನವಲ್ಲದ ಕವನವನ್ನ....

Birthday gift ಅಂತ ಕೊಡ್ತಿದೀನಿ...

ನಿಂಗೊಸ್ಸ್ಕರ...

ಮತ್ತೆಲ್ಲಾ ok....ಕಣ್ಣಲ್ಲಿ ಹನಿ ಮಾತ್ರ ಬೇಡ....ಅದನ್ನ ಒರೆಸಿ ನಿನ್ನ ನಗಿಸಲು ನಾನಿಲ್ಲ ಅಲ್ಲಿ.....ನಂಗೆ ಬೇಜಾರಾಗತ್ತೆ ಕಣೆ...

ನನ್ನಿಷ್ಟದ ಆ ನಿನ್ನ ನಗು...ಎಂದೂ ಹಾಗೆ ಇರಲಿ....

ಮತ್ತೊಮ್ಮೆ...

ಜನ್ಮದಿನದ ಶುಭಾಶಯಗಳು

ಅಪೂರ್ಣ ಸಾಲುಗಳೊಂದಿಗೆ...

ನಿನ್ನ Sou...

ಕಳೆದುಹೋಗಿದೆ ಕವಿತೆ...

2011-07-18T03:21:00.000-07:00

ಯಾಕೋ ಬರೆಯೋಕೆ ಬೇಜಾರು ಅನ್ನಿಸೋಕೆ ಶುರುವಾಗಿ ಸ್ವಲ್ಪ ದಿನಗಳಾಗಿತ್ತು..ಬರೆದ ಕೆಲ ಸಾಲುಗಳೂ ಅಪೂರ್ಣವೆನ್ನಿಸುತ್ತಿತ್ತು....blog ಗೆ ಏನನ್ನೂ ಬರೆಯದೆ ತುಂಬಾ ದಿನಗಳಾಯ್ತು ಏನಾದರೂ ಹಾಕೋಣ ಎಂದು ಹಳೆಯ ಒಂದು ಕವಿತೆಯನ್ನ ಬರೆದಿಟ್ಟದ್ದು ನೆನಪಿಸಿಕೊಂಡೆ. ಆದರೆ ಅದನ್ನ ಬರೆದಿಟ್ಟ ಪುಟ ಸಿಗಲೇ ಇಲ್ಲ...ಆಗ ಹೊಳೆದ ಸಾಲುಗಳಿವು....

ಕಳೆದುಹೋಗಿದೆ ಕವಿತೆ

ಎಲ್ಲೋ ಉದುರಿಹೋಗಿವೆ ನಾ ಬರೆದಿಟ್ಟ ಅಕ್ಷರಗಳು

ಸಿಕ್ಕಿದರೆ ಸಾಕೆನಗೆ ಕೆಲವೇ ಕೆಲವು ಚರಣಗಳು

ಯಾಕೆ ಕಳೆದುಹೋಗಿದ್ದೆ ಎಂದು ನಾ ಗದರಬೇಕದಕ್ಕೆ

ಮನದೊಳಗಿನ ಪ್ರತಿ ಭಾವದ ಬಣ್ಣಗಳನು

ಬಸಿದು,ಬೆಸೆದು, ಹೊಸೆದ ಸಾಲುಗಳು

ಕಣ್ಣಂಚಿನ ಹನಿಯು ಜಾರುವ ಮುನ್ನ

ಪದವಾದ ನೋವು-ನಲಿವುಗಳು

ಅವಳ ಅವನ ಅದರ...

ಎಂದು ಹಳೆಯ ನೆನಪಿನಲಿ ಎಂದೋ ಗೀಚಿಟ್ಟ ಕವಿತೆ

ಪುಟದೊಂದಿಗೆ ಶಾಮೀಲಾಗಿ ಹಾರಿಹೊಯಿತೇ ನನ್ನ ಬಿಟ್ಟು

ಅಪೂರ್ಣವೆಂದಿದ್ದಕ್ಕೆ ಬೇಸರವೋ

ತೃಪ್ತಿ ನೀಡದ ಸಾಲು ಎಂದು ಮುನಿಸೋ

ಕಾರಣ ಹೇಳಲು ಸಾಲುಗಳೇ ಇಲ್ಲ!!!

ಭಾವ ಬೆಸೆವ ಸಾಲುಗಳು

ದ್ವೇಷ ಮರೆಸುವ ಸಾಲುಗಳು

ಸವಿ ನೆನಪಿನ ಸಾಲುಗಳು....

ಕಳೆದುಹೋಗಿವೆ....ಸಿಕ್ಕಿದರೆ ಕೊಟ್ಟುಬಿಡಿ

ಮನಸಿಗೆ ಮುದನೀಡುವ ನನ್ನ ನೆಚ್ಚಿನ ಸಾಲುಗಳನು..

ಹಾರುತಿದ್ದ ಪುಟಗಳ ಚಿತ್ರವ ಹಿಡಿದಿದ್ದು:ಅಂತರ್ಜಾಲದಲ್ಲಿ :)

ಮೆಲುದನಿ

2011-05-02T10:19:00.000-07:00

(ನನ್ನ ಪ್ರಥಮ ಕವನಸಂಕಲನದ ಶೀರ್ಷಿಕೆಯ ಕವಿತೆ ನಿಮ್ಮ ಮುಂದಿಟ್ಟಿದ್ದೇನೆ...)

ನೊಂದವರ ಎದೆಯಾಳದಲಿ ಅಡಗಿದ

ಪ್ರತಿ ಗೀರನು ಸವರಿ,

ಮೌನದಿ ನಾ ಆಲಿಸಿದ ಆ

ಪಿಸುಮಾತಿಗೆ ದನಿಯಾಗಬೇಕೆನಿಸಿತು..

ಕಾದ ಮನಸುಗಳ ನಿಟ್ಟುಸಿರಿಗೆ

ಪ್ರೀತಿಯ ಮಳೆಯಾಗಿ ತೋಯಿಸಿ,

ನಗುವಿನ ಚಿಗುರಿಗೆ

ತಾಯಾಗಬೇಕೆನಿಸಿತು..

ಕೂಗಿ ಹೇಳಬೇಕೆನಿಸಿತು

ಜಗದ ಎಲ್ಲರಿಗೂ,

ಎಲ್ಲರೂ ನನ್ನವರು,

ಎಲ್ಲರ ನೋವು ನನ್ನದೆಂದು.

ಹೆಣ್ಣು ನೀ ಏನು ಮಾಡಲು ಸಾಧ್ಯ?

ಎಂದು ಮೂದಲಿಸಿದವರ ದಿಟ್ಟಿಸಿ,

ನಿನ್ನ ಹೆತ್ತವಳು ಹೆಣ್ಣೇ ತಾನೇ...

ಎಂದು ಕೂಗಬೇಕೆನಿಸಿತು

ಸುಮ್ಮನೆ ಕುಳಿತವಳಿಗೆ..

ಜಗದ ಮೂಲೆಯಲಿ ಮುದುರಿ ಕುಳಿತ,

ನೊಂದ ಜೀವದ ಮೌನಕ್ಕೆ ,

ಮೇಲುದನಿಯಾಗಬೇಕೆನಿಸಿತು.

ಮಹಿಳಾ ದಿನ!!!!!

2011-03-08T00:46:00.000-08:00

ಒಂದೆಡೆ....
ಕೈಲೊಂದು ಪುಟ್ಟ ಗುಲಾಬಿ ಹಿಡಿದು
ಮುದ್ದಾಗಿ ನಗುವ ಮಗು
ಜೊತೆಯಲ್ಲಿ ಕೆಲವರ,
Happy women's day ಎನ್ನುವ wish

ಈ ಒಂದು ದಿನ..
angel,pretty dolls...
ಎಂದೆಲ್ಲಾ ಹೊಗಳುವ message ಗಳು
ನಮಗೊಂದು ದಿನ ಎಂದು ಸಂಭ್ರಮಿಸುವ,ನಗುವ ಹುಡುಗಿಯರು

ಮತ್ತೊಂದೆಡೆ...
ತುತ್ತಿಗೂ ಪರಿತಪಿಸುವ ಹಲವು ಜೀವಗಳು
ಹುಟ್ಟಿಗೂ ಮೊದಲೇ ಸತ್ತ ಹೆಣ್ಣು ಭ್ರೂಣ,
ಸಾಧನೆಯ ಹಾದಿಯಲ್ಲಿ ತೊಡಕಾಗುವ ಕಾಮುಕರು,
ಪ್ರತಿಭಟಿಸಲಾಗದೆ ತಡೆದುಕೊಳ್ಳಲು ಆಗದ ಕಿರುಕುಳಗಳು

ದಯಾಮರಣ ಬೇಡುವಂಥಾ
ಸ್ಥಿತಿಯಲ್ಲಿರುವ ದೈನ್ಯ ಹೆಣ್ಣು,...
ದಿನ ದಿನವೂ ಅತ್ಯಾಚಾರ,acid ಗಳ
ಭಯದಲ್ಲಿ ಮುದುಡುವ ಮುಗ್ಧೆ...
ವಾಂಛೆಗೆ ಬಲಿಯಾದ
ಅದೆಷ್ಟೋ ಜೀವಗಳ ಕಣ್ಣೀರ ನೋಡಲೂ ಪುರುಸೋತ್ತಿಲ್ಲದವರು....

ಈ ಎಲ್ಲದರ ಜೊತೆಗೆ ಅತಿಶಯವೆನಿಸಿದರೂ.....
ಇಂದು ಮಹಿಳಾ ದಿನ!!!!!!

ಮೊಗೆಮೊಗೆದು ಪ್ರೀತಿ ಹಂಚುವವಳಿಗೆ...
ಅಬ್ಬರದ celebration ಬೇಡ...
ಬೊಗಸೆ ಪ್ರೀತಿಯ ಜೊತೆಗೆ...
ಹೆಣ್ಣಾಗಿ ಬದುಕುವ ಹಕ್ಕು ಕೊಡಿ....

ನನ್ನ್ ಗೆಳೆಯ....

2011-02-28T02:50:00.000-08:00

'ಗೆಳತಿಯ ಬಗ್ಗೆ ನಿನ್ನ ಪುಸ್ತಕದಲ್ಲಿ ಕವನ ಇದೆ....ಗೆಳೆಯನ ಬಗ್ಗೆ ಬರೆದಿಲ್ಲ...ಇದು ಮೋಸ' ಎಂದು ಗೆಳೆಯನೊಬ್ಬ ಹೇಳಿದಾಗ ನಂಗೂ ಹೌದೆನ್ನಿಸ್ತು...so ಹೀಗೊಂದು ತರಲೆ try....

ಸುಮ್ನೆ ಹೋಗ್ತಿದ್ರೆ

ತಲೆಗೊಂದು ಮೊಟಕುವವ,

ಯಾರೆಂದು ತಿರುಗಿದರೆ..

ಮತ್ತೊಂದು ಮೊಟಕಿ 'ನಾನೇ ಕಣೇ'

ಎನ್ನುವ ತುಂಟ ನಗೆಯ ಗೆಳೆಯ.

ಬದುಕು-ಬೇಸರ ಅಂತೆಲ್ಲಾ

ವೇದಾಂತ ಹೇಳ್ತಿದ್ರೆ...

'ಮನೇಲಿ ಹೇಳಿಬಂದಿದ್ಯಾ??'ಅಂತ

ಮುಲಾಜಿಲ್ಲದೆ ಉಗಿತಾನಲ್ಲ..

ಅವನೇ ನನ್ನ ಗೆಳೆಯ.

ರುಚಿ ಇಲ್ಲದ ಊಟ

ಸೇರಲ್ಲ ಕಣೋ ಅಂದ್ರೆ..

ಇಂದು ತಾನೂ ಉಪವಾಸ

ಎಂದು ಬೆದರಿಸಿ ಉಣಿಸುವ

horrible ಗೆಳೆಯ...

ನಡುರಾತ್ರೀಲಿ call ಮಾಡಿ

'ಮಲಗಿದ್ಯೇನೆ?ಸರಿ ಬರ್ಲಾ...'

ಎಂದು ಮುಸಿ ಮುಸಿ ನಗುವ ತರಲೆ

ಆದರೂ sweet ಎನ್ನಿಸುವ ಗೆಳೆಯ

ಮನದಲಿದ್ದುದನೆಲ್ಲ

silly ಅನಿಸಿದರೂ ಸರಿಯೇ

ಸುಮ್ಮನೆ ಹೊರ ಹಾಕಿ

'ಕೇಳೋದು ನಿನ್ನ್ ಕರ್ಮ'ಎನ್ನುವ

ಮಗುವಿನಂಥಾ ಗೆಳೆಯ

ಅಮ್ಮನಂಥಾ ಗೆಳೆಯ

ಅಣ್ಣನಂಥಾ ಗೆಳೆಯ...

ಮನದ ಗೂಡಲ್ಲಿರುವ ಮುಗ್ಧ ಗೆಳೆಯ...

sorry...ಇವ ಇನಿಯನಲ್ಲ 'ನನ್ನ ಗೆಳೆಯ'

ಅಪ್ಪನ ಹೆಜ್ಜೆ ಗುರುತು....

2011-02-26T09:57:00.000-08:00

hi friends...ಚಿಕ್ಕೋರಿದ್ದಾಗ ಎಲ್ಲರಿಗೂ ಅಪ್ಪ ನೇ ಹೀರೋ..ಬೆಳೆಯುತ್ತಾ ಎಲ್ಲೋ ಒಮ್ಮೊಮ್ಮೆ ಅಪ್ಪನ ವಿಚಾರ ತಪ್ಪು ಎನ್ನಿಸುವುದೂ ಇದೆ...ಆದರೂ ಅಪ್ಪನ ಅನುಭವ ನಮಗೆ ಪಾಠ.ಹೀಗೆ ಅನುಭವ,ಕಲ್ಪನೆ ಎರಡನ್ನೂ ಜೊತೆಗೂಡಿಸಿ, ಗೀಚಿ ನಿಮ್ಮ ಮುಂದಿಟ್ಟಿದ್ದೇನೆ..ಹೇಗಿದೆ??ಓದಿ ಹೇಳಿ.

ಭುವನಾ ಇಳಿಸಂಜೆಯ ಹೊತ್ತಲ್ಲಿ ಮನೆಯಿಂದ ಸ್ವಲ್ಪ ದೂರದಲ್ಲಿರುವ ಸಮುದ್ರದ ಅಂಚಲ್ಲಿ ಕುಳಿತಿದ್ದಳು....ಅದು ಆಕೆಗೆ ತುಂಬಾ ಇಷ್ಟವಾದ ಜಾಗ...ಅಲ್ಲಿರುವ ಮರಳ ಕಣಗಳಷ್ಟೇ ಮಧುರ ನೆನಪುಗಳು ಆ ತೀರದಲ್ಲಿ ಅಡಗಿ ಕುಳಿತಿವೆ...ಆಗೊಮ್ಮೆ ಈಗೊಮ್ಮೆ ಕಣ್ಣೀರ ಹನಿಯೂ ಆ ಮರಳಿನಲ್ಲಿ ಇಂಗಿದ್ದಿದೆ.ಒಟ್ಟಿನಲ್ಲಿ ಆ ತೀರಕ್ಕೂ ಆಕೆಗೂ ಅವಿನಾಭಾವ ಸಂಬಂಧ.ಜೊತೆಯಲ್ಲಿ ಯಾರಾದರೂ ಇದ್ದರೆ ಅಲೆಗಳ ಜೊತೆ ಚೆಲ್ಲಾಟ,ಇಲ್ಲವಾದರೆ ಹಾಗೇ ಸುಮ್ಮನೆ ಅವುಗಳನ್ನ ನೋಡುತ್ತಾ ಕಾಲ ಕಳೆಯುವುದು ಅವಳಿಗೆ ಅಚ್ಚುಮೆಚ್ಚು.ಆ ದಿನವೂ ಹಾಗೇ...ಸುಮ್ಮನೆ ಮರಳ ಮೇಲೆ ಕುಳಿತಿದ್ದಳು,ಅಂಟಿಕೊಂಡು ಹೆಜ್ಜೆಹಾಕುತ್ತಿದ್ದ ಪ್ರೇಮಿಗಳು,ತಮ್ಮದೇ ಲೋಕದಲ್ಲಿ ವಿಹರಿಸುತ್ತಿದ್ದ ಜನರು..ಮರಳಲ್ಲಿ ಆಟವಾಡುತ್ತಿದ್ದ ಪುಟ್ಟ ಮಕ್ಕಳು...ಹೀಗೆ ಎಲ್ಲರ ಕಡೆಗೆ ತನ್ನ ನೋಟ ಬೀರಿದಳು..ಅವಳ ನೋಟವನ್ನು ಸೆಳೆದಿದ್ದು ಒಂದು ಪುಟಾಣಿ ಮಗು,ಅದು ತನ್ನ ಅಪ್ಪನ ಹಿಂದೆ ನಡೆಯುತ್ತಿತ್ತು,ಆ ಪುಟ್ಟ ಪುಟ್ಟ ಕಾಲುಗಳಿಂದ ಹೆಜ್ಜೆಯಿದುವುದನ್ನು ನೋಡುವುದೇ ಕಣ್ಣಿಗೆ ಹಬ್ಬ. ಅಪ್ಪನ ಹೆಜ್ಜೆಗುರುತಿನ ಮೇಲೆ ತನ್ನ ಹೆಜ್ಜೆಯನ್ನು ಇಡಲು ಹರಸಾಹಸಪಡುತ್ತಿತ್ತು.ಆ ದೃಶ್ಯ ಅವಳನ್ನು ಹಳೆಯ ದಿನಗಳಿಗೆ ಎಳೆದುಕೊಂಡು ಹೋಯ್ತು....'ನಾನೂ ಹೀಗೆ ಅಪ್ಪನ ಹಿಂದೆ ನಡೆಯುತ್ತಿದ್ದೆ...ಆ ಹೆಜ್ಜೆಗಳ ಮೇಲೆ ಹೆಜ್ಜೆ ಇಡಲು ಕಷ್ಟಪಡುತ್ತಿದ್ದೆ...ಬಿದ್ದರೂ ಸರಿಯೇ ಮತ್ತೆ ಅದೇ ಯತ್ನ,ಅಪ್ಪ ಹಲವು ಬಾರಿ ನಗುತ್ತಿದ್ದರು.ಅಮ್ಮ ಹೇಳುವುದಿತ್ತು 'ಅಪ್ಪನ ಪಡಿ ಅಚ್ಚು ಈ ಕೂಸು,ಅನ್ಸಿದ್ದನ್ನ ಮಾಡೋವರೆಗೂ ಬಿಡಲ್ಲ'ಅಂತ, ಅವರು ಹೇಳಿದ್ದರಲ್ಲಿ ಅತಿಶಯ ಏನಿರಲಿಲ್ಲ,ನನ್ನಪ್ಪ ನಂಗೆ ತುಂಬಾ ಇಷ್ಟ.ಮಿತವಾದ ಮಾತು ಹಿತವೆನಿಸುವ ನಡೆ,ತನ್ನ ಆದರ್ಶದಂತೆ ಬದುಕುತ್ತಿದ್ದ ಅವರು ಎಂದಿಗೂ ಅವುಗಳನ್ನೂ ನಮ್ಮ ಮೇಲೆ ಹೊರಿಸಿದ್ದಿಲ್ಲ.ಪ್ರತಿಯೊಂದಕ್ಕೂ ಸಲಹೆ ಮಾತ್ರ ಅವರದ್ದು ಆಯ್ಕೆ ಮಾತ್ರ ನನ್ನದೇ...ಮಗಳ ಆಯ್ಕೆ ತಪ್ಪಿರಬಹುದೇ? ಎಂಬ ಕಿಂಚಿತ್ ಶಂಕೆಯೂ ಇರುತ್ತಿರಲಿಲ್ಲ.ನನ್ನ ಬೆಳೆಸಿದ ರೀತಿಯಲ್ಲಿ ಅಪ್ಪನಿಗೆ ಅಚಲವಾದ ವಿಶ್ವಾಸ.ಅವರ ಜೀವನ ಶೈಲಿ ತುಂಬಾ ಸರಳ,ಅಪ್ಪಾ ಹೊಸ ಬಟ್ಟೆ ತಗೋ ಇದು ಹಳೆಯದಾಯ್ತು ಅಂದ್ರೆ ‘ನಮ್ಮ ವ್ಯಕ್ತಿತ್ವದಿಂದ ಗೌರವ ಸಿಗಬೇಕೇ ಹೊರತು ಬಟ್ಟೆ,ಅಲಂಕಾರಗಳಿಂದಲ್ಲ.’ಎನ್ನುವ ಉತ್ತರ.!!ಗೊಡ್ಡು ಸಂಪ್ರದಾಯವನ್ನು ಎಂದಿಗೂ ಒಪ್ಪುತ್ತಿರಲಿಲ್ಲ.ಸತ್ಯ,ಪ್ರಾಮಾಣಿಕತೆ ಬದುಕಿನ ಆಧಾರಸ್ತಂಭಗಳು ಎಂದು ನಂಬಿದ್ದವರು...ಅಪ್ಪನ ಬಗ್ಗೆ ಎಷ್ಟು ಹೇಳಿದರೂ ಸಾಲದು.ಹರೆಯದಲ್ಲಿ ಕೆಲವು ಬಾರಿ ಅಪ್ಪನ ವಿಚಾರಧಾರೆ ಸರಿಯಾಗಿ ಅರ್ಥವಾಗದೆ ಅಲ್ಲೋ ಇಲ್ಲೋ ಒಮ್ಮೆ ದಾರಿ ಬದಲಿಸಲೇ ಎಂದು ಬುದ್ದಿ ಮನಸನ್ನು ಕೇಳಿದ್ದಿದೆ..ಆದರೆ ಮನಸು ಮಾತ್ರ ಅಪ್ಪನ ದಾರಿಯನ್ನು ಬಿಡಲು ಒಪ್ಪಲೇ ಇಲ್ಲ...ಮನಸಿನ ಮಾತನ್ನ ಕೆಳುವವಳು ನಾನು ಅದಕ್ಕೆ ಅಪ್ಪನ ದಾರಿಯಲ್ಲೇ ನಡೆದೆ.ಕಳೆದುಹೋದವರ ಬಗ್ಗೆ ಬೇಜಾರಿದೆ,ಆದರೆ ಜೋತೆಯಿರುವವರೆಲ್ಲಾ ಎಂದಿಗೂ ಕೈ ಬಿಡದವರು.ಇದೆಲ್ಲಾ ಅಪ್ಪನ ಆದರ್ಶಗಳನ್ನು ನಾ ಇಷ್ಟಪಟ್ಟು ಮೈಗೂಡಿಸಿಕೊಂದಿದ್ದಕ್ಕೆ.ಅದರಲ್ಲೂ ನನ್ನ ಸ್ವಂತಿಕೆ ಇರುವಂತೆ ನನ್ನ ಬದುಕನ್ನ ರೂಪಿಸಿಕೊಳ್ಳುವ ಅವಕಾಶ ಕೊಟ್ಟಿದ್ದು ಈ ನನ್ನಪ್ಪ....ಹೊತ್ತು ಮುಳುಗುತ್ತಿದ್ದಂತೆ ರಭಸಗೊಂಡ ಅಲೆಗಳಂತೆ ಅಪ್ಪನ ಮೇಲಿನ ಅಭಿಮಾನ ಹೆಚ್ಚಾಗುತ್ತಲೇ ಇತ್ತು..ಸಮಯದ ಅರಿವಿಲ್ಲದೆ ಯೋಚನಾ ಲಹರಿಯಲ್ಲಿ ಇದ್ದ ಅವಳು ವಾಸ್ತವಕ್ಕೆ ಬಂದದ್ದು ಅಪ್ಪ ಬಂದು 'ಮಗಳೆ ಬಾ ಮನೆಗೆ ಹೋಗೋಣ ಅಮ್ಮ ಕಾಯ್ತಾ ಇರ್ತಾಳೆ ಎಂದಾಗ..'ಮತ್ತೆ ಅಪ್ಪನ ಹೆಜ್ಜೆಯ ಮೇಲೆ ತನ್ನ ಹೆಜ್ಜೆ ಇಡುತ್ತಾ ಮನೆಯ ದಾರಿ ಹಿಡಿದಳು.

ಅವಳ ಸಂಭ್ರಮ....

2011-01-22T03:31:00.000-08:00

ಅವಳು ಬಹಳ ದಿನದಿಂದ ಆ ಅದ್ಭುತ ಕ್ಷಣಕ್ಕೆ ಕಾಯುತ್ತಿದ್ದಳು...ಒಡನಾಡಿಗಳ ಉಪಸ್ಥಿತಿಯಿರಲಿ ಎಂದು ಸಂಭ್ರಮದಿಂದಲೇ ಎಲ್ಲರಿಗೂ ಕರೆದಿದ್ದಳು....ಬರುವ ಮನಸ್ಸಿದ್ದರೂ ಬರಲಾಗದವರು ಹಲವರು, ಒಲ್ಲದ ಮನಸಿನವರು ಕೆಲವರು....ಯಾಕೋ ಆ ಸಂತಸದ ಕ್ಷಣದಲ್ಲಿಯೂ ಒಮ್ಮೆ ಮನ ಕೊಂಚ ಮಂಕಾಗಿತ್ತು...ಮತ್ತೆ ಸಾವರಿಸಿಕೊಂಡು,ಎಷ್ಟೇ ತೊಂದರೆಯಿದ್ದರೂ,ಮಾಡಬೇಕಾದ ಕಾರ್ಯಗಳನ್ನೆಲ್ಲ ಬದಿಗೊತ್ತಿ ಬಂದ sweet friends ಜೊತೆ ಒಂದಾದಳು.ನೆಚ್ಚಿನ ಗೆಳತಿ ಅರ್ಧಕ್ಕೆ ಹೊರಟಿದ್ದು,ಮತ್ತೊಬ್ಬಳು ಬಾರದೆ ಇದ್ದದ್ದು...ನೋವು ಯಾರಿಗೂ ಹೇಳಲಾಗದೆ ಮನದಲ್ಲಿ ಉಳಿದುಹೋಯಿತು..ಹೇಳಿದರೂ ಯಾರಿಗೂ ಅದು ಅರ್ಥ ಆಗದು ಎಂಬುದು ಅವಳಿಗೆ ಗೊತ್ತು.ಈ ಕಲ್ಪನಾವಿಹಾರಿ ಅವರಿಗೆ ನಗೆಯ ವಸ್ತು...ಬರುವ ಮನಸ್ಸಿದ್ದೂ ಬರಲಾಗದೆ ಇದ್ದವರ ಬಗ್ಗೆ ಬೇಸರವೇನಿಲ್ಲ ಆಕೆಗೆ...ಮನಸಲ್ಲಿ ಇದ್ದದ್ದು ಒಂದೇ ಮಾತು.'ಇರಲಿ...ನಂಗೂ time ಬರತ್ತೆ...'ಎಂಬ ಮೆಲುದನಿ.
ಅವಳ ಬದುಕಿನ ಬಂಗಾರದ ಕ್ಷಣಗಳು ಎಂದೂ ಮರೆಯದ ನೆನಪಾಗಿ ಉಳಿಯಿತು.....:)
ಹರಸಿ ಹಾರೈಸಿದವರೆಲ್ಲರಿಗೂ ಅವಳ ಮೆಲುದನಿಯ ಮಾತು ' ತುಂಬು ಹೃದಯದ ನಮನಗಳು....'

ರುಚಿcut ಆದ ತಿನಿಸುಗಳು

2011-01-05T22:01:00.000-08:00

hi friends...
ನಮ್ಮ ಹಾಸ್ಟೆಲ್ ನಲ್ಲಿ ಮಾಡುವ ಕೆಲವು ರುಚಿcut ಆದ ಕೆಲವು ತಿನಿಸುಗಳ ಮಾಡುವ ವಿಧಾನ jsut for u.
(ಈ ಎಲ್ಲ recipie try ಮಾಡೋದಾದ್ರೆ ನಿಮ್ಮ taste buds ಜೀವಕ್ಕೆ ನೀವೇ ಹೊಣೆ)

ಹಾಲು:
ತಯಾರಿಸುವ ವಿಧಾನ:ಇದೇನಪ್ಪಾ?ಹಾಲು ತಯಾರಿಸೋ ವಿಧಾನ ಅಂತ ಇದೆ.ಹಾಲು ಪುಡಿ ಹಾಕಿ ಅಂತ ಅನ್ಕೊಂಡ್ರಾ?ಖಂಡಿತ ಇಲ್ಲ...ನೀವೇ ಓದಿ ನೋಡಿ ....
ನೀರನ್ನು ಕಾಯಲು ಇಡಿ.ನೀರು ಕುದಿ ಬಂದ ಕೂಡಲೇ ಅದಕ್ಕೆ ಹಾಲಿನ ಹನಿಯನ್ನು ಹಾಕುತ್ತಿರಿ.ನೀರಿನ ಬಣ್ಣ ಬದಲಾದ ತಕ್ಷಣ ಹಾಲಿನ ಹನಿಯನ್ನು ಹಾಕುವುದನ್ನು ನಿಲ್ಲಿಸಿ.(same as titration ;) )
ಬಿಸಿ ಬಿಸಿ ಹಾಲು ಸಿಧ್ಧ.ಇನ್ನು ಈ ಹಾಲಿನ ಮೊಸರು ಇನ್ನೆಷ್ಟು ಗಟ್ಟಿ ಇರಬಹುದು??ನೀವೇ ಊಹಿಸಿ.(ಅದಕ್ಕೆ safetyಗೆ ನಾವು ಚಾಕು ತಗೊಂಡು ಊಟಕ್ಕೆ ಹೋಗ್ತೀವಿ.ಗಟ್ಟಿ ಮೊಸರನ್ನು cut ಮಾಡಲು;) )
ಚಹಾ:
ಕುದಿಯುತ್ತಿರುವ ನೀರಿಗೆ ಚಹಾ ಪುಡಿ ಹಾಕಿ ಚೆನ್ನಾಗಿ ಕುದಿಸಿ ಅದನ್ನು ಸೋಸಿ ಅದಕ್ಕೆ ಸಕ್ಕರೆ ಮತ್ತು ಈ ಮೇಲೆ ತಯಾರಿಸಿದ ಹಾಲು ಎಂಬ ಪದಾರ್ಥವನ್ನು ಸೇರಿಸಿದರೆ ಬಿಸಿ ಬಿಸಿ ಚಹಾ ಸಿಧ್ಧ.

ತಿಳಿ ಸಾರು(ನೀರು)
ಕುದಿಯುತ್ತಿರುವ ನೀರಿಗೆ ಸ್ವಲ್ಪ ಉಪ್ಪು ಮೆಣಸಿನಪುಡಿ ಹಾಕಿ ಚೆನ್ನಾಗಿ ಕಲಕಿ.ಅದಕ್ಕೆ ಹೆಚ್ಚಿಕೊಂಡಿರುವ ಟೊಮೆಟೋ ಹಾಕಿ ನಂತರ ಒಗ್ಗರಣೆ ಮಾಡಿದರೆ ತಿಳಿ ಸಾರು ಸವಿಯಲು ಸಿಧ್ಧ.

ದಾಲ್ ಮತ್ತು ಸಾಂಬಾರ್:
ಬೇಳೆಯನ್ನು ಬೇಯಲು ಇಡಿ.ನಂತರ ಅದರ ನೀರನ್ನು ಬಸಿದು ಆ ನೀರಿಗೆ ಸ್ವಲ್ಪ ಉಪ್ಪು ಹಾಗು ಹುಣಸೆಹುಳಿ ಜೊತೆಗೆ ಮೆಣಸಿನಪುಡಿ ಹಾಕಿ ತರಕಾರಿಯ ಹೋಳನ್ನು ತೇಲಿಬಿಡಿ(ತರಕಾರಿ ಎಂದರೆ ಮೂಲಂಗಿ,ಬದನೇಕಾಯಿ ಹಾಗೂ ಸೌತೆಕಾಯಿ ಮಾತ್ರ.)ಟೊಮೆಟೋ ಮತ್ತು ಈರುಳ್ಳಿಯ ಪ್ರಮಾಣ ಮಾರುಕಟ್ಟೆಯಲ್ಲಿ ಅದರ rate ಎಷ್ಟು ಎನ್ನುವುದರ ಮೇಲೆ depend.
ಮತ್ತೊಂದು ಪಾತ್ರೆಯಲ್ಲಿರುವ ಬೇಳೆಗೆ ಉಪ್ಪು ಹಾಕಿ ಜೊತೆಗೆ ಒಂದಷ್ಟು ಹಸಿಮೆಣಸಿನಕಾಯಿ ಟೊಮೆಟೋ ಮತ್ತು ಈರುಳ್ಳಿ ಹಾಕಿ ಬೇಯಿಸಿದರೆ ದಾಲ್ ready.

ಜಾಮೂನ್:
ಜಾಮೂನ್ ಮಿಕ್ಸ್ ಗೆ ಸ್ವಲ್ಪ ಮೈದಾಹಿಟ್ಟನ್ನು ಹಾಕಿ ಬೇಕಾದಷ್ಟು ನೀರನ್ನು ಹಾಕಿ ಕಲಸಿ.ನಂತರ ಚಿಕ್ಕ ಚಿಕ್ಕ ಉಂಡೆಗಳನ್ನಾಗಿ ಮಾಡಿ ಕಾದ ಎಣ್ಣೆಯಲ್ಲಿ ಕರಿಯಿರಿ.(ನೆನಪಿರಲಿ ಜಾಮೂನ್ ಉಂಡೆ ಮಧ್ಯದಲ್ಲಿ ಬೇಯಬಾರದು)
ಸಕ್ಕರೆ ಪಾಕ ಮಾಡುವ ವಿಧಾನ:ನೀರಿಗೆ ಸಕ್ಕರೆ ಹಾಕಿ ಕುದಿಯಲು ಇಡಿ.ಕುದಿಯುವ ಮುನ್ನವೇ ಅದಕ್ಕೆ ಕರಿದಿಟ್ಟ ಉಂಡೆಗಳನ್ನು ಹಾಕಿದರೆ ಜಾಮೂನ್ ಸಿಧ್ಧ.:)

ಮರಳು ಮರಳಾಗಿರುವ ಮರಳುಂಡೆ(ರವೆ ಉಂಡೆ)
ಬಾಣಲೆಗೆ ವನಸ್ಪತಿಯನ್ನು ಹಾಕಿ.ಜೊತೆಗೆ ತುಪ್ಪ ಎನ್ನುವ ದ್ರವವನ್ನು ತೋರಿಸಿ.ರವೆಯನ್ನು ಹುರಿದುಕೊಳ್ಳಿ.ಪೂರ್ತಿಯಾಗಿ ಹುರಿಯಬಾರದು.ನಂತರ ಸಕ್ಕರೆಪಾಕವನ್ನು (ಜಾಮೂನ್ ಗೆ ತಯಾರಿಸುವಂತೆ ಸಕ್ಕರೆಪಾಕವನ್ನು ತಯಾರಿಸಿಕೊಳ್ಳಿ)ಹಾಕಿ mix ಮಾಡಿ ಉಂಡೆಕಟ್ಟಿ.ಬೇಕಾದರೆ ತಿನ್ನಬಹುದು ಇಲ್ಲವಾದರೆ table tennis ball ಆಗಿಯೂ ಉಪಯೋಗಿಸಬಹುದು.multipurpose
ಸಧ್ಯಕ್ಕೆ ಇಷ್ಟು ಸಾಕು.ಓದಿ ಆನಂದಿಸಿ.ಇದನ್ನು ತಿನ್ನುವ ನಮ್ಮ ಪಾಡೇನು?????

ಮೆಚ್ಚಿನ ಗೆಳೆಯನಿಗೊಂದು ಪತ್ರ..

2011-01-04T07:42:00.001-08:00

Hi my dear stupid…
ನಿನ್ನ ನೆನಪು ಅಂತೆಲ್ಲಾ ನಂಗೆ ಕಾಡಿದ್ದೇ ಇಲ್ಲ...ಯಾಕಂದ್ರೆ ನೆನಪಾಗಿ ಕಾಡೋಷ್ಟು ದೂರ ನಾವು ಯಾವತ್ತೂ ಇರಲೇ ಇಲ್ಲ...ಅಲ್ವಾ...ಇಡೀ ದಿನ msgಲಿ ತಲೆತಿನ್ನೋದು ಇದ್ದಿದ್ದೇ...ನಾ ನಿನ್ನ ಕಾಲೆಳೆಯೋದು,ನೀನೇನು ಕಮ್ಮಿ ಇಲ್ಲ ಬಿಡು..ಈಗೀಗ ನೀ ಅಪರೂಪ ಆಗಿದ್ದಕ್ಕೆ ನಿನ್ನ ನೆನಪು ಕಾಡೋದು ಜಾಸ್ತಿ ಆಗಿದೆ ಅನ್ನಿಸ್ತಾ ಇದೆ ಕಣೋ.
ಭಾವನೆಗಳನ್ನ ಹೇಳೋಕೆ ಮಾತು ಬೇಕು ಅಂತಿಲ್ಲ ಬರೀ blank message ಕೂಡ ಸಾಕಾಗಿತ್ತು ನಮ್ಗೆ,ಅದು ಹೇಗೆ ಅರ್ಥ ಮಾಡಿಕೊಂಡ್ವಿ ಅದು ಹೇಗೆ ಇಷ್ಟು ಒಳ್ಳೆ ಸ್ನೇಹಿತರಾದ್ವಿ ಅನ್ನೋದು ನಮಗೆ ಇನ್ನೂ ಕಾಡೋ ಪ್ರಶ್ನೆ ಅಲ್ವಾ...ಉತ್ತರ ಸಿಗಲ್ಲ ಅನ್ಸತ್ತೆ ಅದ್ಕೆ...ಆದ್ರೆ ನೀನು ನನ್ನ ಸ್ನೇಹಿತ ಅಂತ ಅನ್ನೋದಕ್ಕಿಂತ a special person ಕಣೋ..city bus ಲಿ foot board ಲಿ ನಿಂತಿದ್ದನ್ನ ನೋಡಿ ಗದರಿದ್ಯಲ್ಲಾ ಆಗ ಮತ್ತೆ ‘ಸಂಜೆ last bus ಗೆ ಹೊರಟಿದಿಯಲ್ಲಾ ನಿಂಗೇನ್ ಹುಚ್ಚಾ’ ಅಂತ ರೇಗಿದ್ದು ಇದೆಲ್ಲ ಥೇಟ್ ಅಣ್ಣನ ತರ,ಒಮ್ಮೆ ನನ್ನ ಅಣ್ಣ ಬರ್ತಾನೆ ಅಂತ ಹೇಳಿ ಶಿವಮೂರ್ತಿ ಸರ್ಕಲ್ ಲಿ ಕಾಯ್ತಿದ್ದೆ.ಆಗ ಒಬ್ಬಳೇ ನಿಲ್ಲಬೇಡ ಅಂದೋನು ಮರುಕ್ಷಣದಲ್ಲೇ ಅಲ್ಲಿಗೆ ಪ್ರತ್ಯಕ್ಷ ಆಗ್ಬಿಟ್ಟಿದ್ಯಲ್ಲಾ ಅದೆಷ್ಟು caring ನೀನು....ನೀ ಹುಡುಗ ನಾ ಹುಡುಗಿ ಅನ್ನೋ ಗೆರೆ ನಮ್ಮ ಗೆಳೆತನದಲ್ಲಿ ಇಲ್ವೆಇಲ್ಲ...ಬರೋದೂ ಬೇಡ ಬಿಡು.ಒಮ್ಮೆ ನೀ ನನ್ನ fav. colour t-shirt ಹಾಕ್ಕೊಂಡ್ ಬಂದಿದ್ದೆ ಆಗ ನಾ ನಿನ್ನ್ ಹತ್ತಿರ ಬಂದು ‘ಸಕತ್ತಾಗ್ ಕಾಣ್ತಿದಿಯಾ ಮಾರಾಯ ಏನು ಯಾರಿಗೆ ಕಾಳು ಹಾಕೋಕೆ ಈ ವೇಷ??’ಎಂದು ಕಣ್ಣು ಮಿಟುಕಿಸಿ ಬಂದಿದ್ದೆ ನೆನಪಿದ್ಯಾ?ಅದನ್ನ ನೋಡಿ ನನ್ನ ಫ್ರೆಂಡ್ ಸಿಕ್ಕಾಪಟ್ಟೆ ಗಾಬರಿ ಆಗೋಗಿದ್ಲು ‘ಏನೇ ಇದು?ಅವ್ನು ಏನನ್ಕೊತಾನೆ ಅಂತ ಯೋಚ್ನೇನು ಮಾಡ್ದೆ ಹಾಗೆಲ್ಲ ಹೇಳಿ ಬಂದಿದ್ದೀಯಲ್ಲ ತಾಯಿ’ ಅಂತ ನನ್ನ ತರಾಟೆಗೆ ತಗೊಂಡ್ಲು.ಅದ್ರಲ್ಲೇನಿದ್ಯೇ ನಿಂಗೂ ಹಾಗೇ ರೇಗ್ಸ್ತೀನಿ ತಾನೇ?ಹಾಗೇ ಇವನಿಗೂ, ಫ್ರೆಂಡ್ಸ್ ಎಲ್ಲಾರೂ ಒಂದೇ ಅದರಲ್ಲಿ ಹುಡುಗ ಹುಡುಗಿ ಅಂತೆಲ್ಲ ಬೇರೆ ಮಾಡಿ ಮಾತಾಡೋಕೆ ಬರಲ್ಲ ಅಂದಿದ್ದೆ ಕಣೋ.ನೀನಂತೂ ಏನೂ ಅಂದುಕೊಳಲ್ಲ ಅನ್ನೋ ನಂಬಿಕೆ ಇತ್ತಲ್ಲ ನಂಗೆ..ಬಿಟ್ಟಿ ಡೈಲಾಗ್ ಹೇಳೋಕೆ ನನಗೇನು ಹೇಳು?
ಮೊನ್ನೆ friend ಜೊತೆ ಮಥುರಾ ಹತ್ತಿರ ಬಂದಿದ್ದೆ..ಅವಳಿಗೆ ಏನೋ ಕೆಲಸ ಇತ್ತು ಅಂತ...ಅಲ್ಲಿ ಪಾರ್ಕಲ್ಲಿ ನಾವು ಯಾವಾಗ್ಲೂ ಕೂತು ಕಥೆ ಹೇಳ್ತಿದ್ದ ಜಾಗ ನೋಡಿ ಯಾಕೋ ಅಳುವೇ ಬಂತು ಕಣೋ.
ಅಲ್ಲೇ ಅಲ್ವಾ ನಾವಿಬ್ರು ಮಾತಾಡ್ತಿದ್ದಿದ್ದು..ಅಲ್ಲೇ ಅಲ್ವಾ...’my autograph’ ನ ಶಂಕರ್-ದಿವ್ಯಾ ನ ನಾವು ಮೀರಿಸಬೇಕು ಅಂತೆಲ್ಲಾ ಮಾತಾಡಿದ್ದು..ಎಲ್ಲದಕ್ಕಿಂತ ಅಲ್ಲೇ ಅಲ್ವಾ ನಾವು ಮೊದಲು ಮನಬಿಚ್ಚಿ ಮಾತಾಡಿದ್ದು...ಅವತ್ತಿಂದ ಅದು ನಮ್ಮ fav. place ಆಗಿಹೋಯ್ತು .ಬೇಜಾರಾದ ತಕ್ಷಣ ನಾ ಅಲ್ಲಿ ಬರ್ತಿದ್ದೆ.ಆಗೆಲ್ಲ ಬಂದು ನಂಗೆ ಸಾಥ್ ಕೊಡ್ತಿದ್ದ ಕೋತಿ ನೀನು.ಅಲ್ಲಿ ಕೂತ್ಕೊಂಡು ಮಾತಾಡ್ತಾ ನಾ ಯಾಕೆ ಬೇಜಾರಾಗಿದ್ದೆ ಅನ್ನೋದನ್ನೇ ಮರೆಯೋ ಹಾಗೇ ಮಾಡ್ತಿದ್ದೆ ನೀನು.ಆಮೇಲೆ ಅಲ್ಲೇ ಕೂತ್ಕೊಂಡು ಕಡ್ಲೆಕಾಯಿ ತಿಂದು ಅಲ್ಲಿಗೆ ಬರೋ ಹುಡುಗಿರ್ನೆಲ್ಲಾ ತೋರ್ಸಿ ಇವ್ಳು ನನ್ನ ಅತ್ತಿಗೆ ಅಂತೆಲ್ಲ ನಿನ್ನ ಕಿವಿಲಿ ಪಿಸುಗುಡ್ತಾ..ನಿನ್ನ ಮುಖ ಕೆಂಪಾಗಿ ನೀ ನಂಗೆ ಬಯ್ಯೋವರೆಗೂ ಇದು ನಡೀತಿತ್ತು.ನಿಂಗೆ ಕೋಪ ಬಂದಿದ್ದು ಗೊತ್ತಾದರೂ ಯೇ ಹೋಗ್ಲಿ ಬಿಡೋ ಅದಕ್ಕ್ಯಾಕೆ ಅಷ್ಟು ನಾಚಿಕೆ ಅಂತ ನಾ ಮತ್ತೆ ಹೇಳೋದು ಇದು ನಮಗೆ ಮಾಮೂಲು....
ಇವತ್ತಿಗೂ ನಿನ್ನಮೇಲೆ ನಂಗೆ ಬೇಜಾರಿಲ್ಲ ಕಣೋ.ಮೊನ್ನೆ ನಂಗೆ ಬೇಜಾರಾಗ್ತಿದೆ ಅಂತ ಹೇಳಿದಾಗ 'ಸರಿ ಹಾಗಾದ್ರೆ ನಾಳೆ ಮಾತಾಡ್ತೀನಿ' ಅಂತ ಸುಮ್ಮನಾದೆ ನೋಡು ಆಗ ನಂಗೆ doubt ಆಗಿದ್ದು ಇವನೇನಾ ನಂಗೆ ಬೇಜಾರು ಅಂದಿದ್ದಕ್ಕೆ ತಕ್ಷಣ ನೆಹರೂ ಸ್ಟೇಡಿಯಂ ಗೆ ಓಡಿ ಬಂದಿದ್ದು ಇವನೇನಾ ಸಂಜೆ ಆದರೂ ನನ್ನ ಹಾಸ್ಟೆಲ್ಗೆ ಬಿಟ್ಟು ಮತ್ತೆ ವಾಪಾಸ್ ಹೋದ ಗೆಳೆಯ ಅಂತ ಅನುಮಾನ ಬಂತು ಕಣೋ...ಈಗೀಗ ಮಾತಾಡೋದು ಕಡಿಮೆ ಆಗೋಗಿದೆ.message ಮಾಡೋದು ಯಾಕೋ ಕಮ್ಮಿ ಅಂತ ಕೇಳಿದ್ರೆ message ಮಾಡಿಲ್ಲ ಅಂದ್ರೆ ಮರ್ತಿದಿನಿ ಅಂತ ಅರ್ಥನಾ?ಅಂತ ಕೇಳಿದ್ದೆ ನೀನು.ಅರ್ಥ ಅದಲ್ಲ ಆದ್ರೆ 24x7 chatting ಲಿ busy ಇರ್ತಿದ್ದ ನಾವು ಈಗ ಅಲ್ಲೋ ಇಲ್ಲೋ ಅಪರೂಪಕ್ಕೆ chat ಮಾಡ್ತೀವಿ ಅದಕ್ಕೆ ಬೇಜಾರು ನಂಗೆ.ಕಾರಣ ಕೇಳೋಕೆ ನಂಗೆ ಮನಸಾಗ್ತಿಲ್ಲ ನಿಂಗೆ ಹೇಳ್ಬೇಕು ಅನ್ನಿಸಿದಾಗ ಹೇಳು.ಈ ಪತ್ರ ನೋಡಿ ನಿಂಗೆ ನಗು ಬರಬಹುದು.
ನಕ್ಕುಬಿಡು...ಮತ್ತೆ ಮೊದಲಿನಂತಾಗು ಪ್ಲೀಸ್....
-sweety
`

ಛಿದ್ರಗೊಂಡ ಬದುಕು...

2010-11-08T09:54:00.001-08:00

ಹೀಗೆ ನನ್ನ friend ಪ್ರದೀಪ್ profileಲಿ ಒಂದು photo ಕಂಡೆ...ಯಾಕೋ ಇಷ್ಟ ಆಯ್ತು....ಕವನ ಬರಿಬೇಕು ಅನ್ನಿಸಿತು, ಹಾಗೆ ಗೀಚಿದೆ....ಕೇಳಿದ ತಕ್ಷಣ photo mail ಮಾಡಿದ ಪ್ರದೀಪ್ ಗೆ ನನ್ನ thanks...thank u pradeep...

ಮರಳ ದಂಡೆಯ ಮೇಲೆ

ಮಗುಚಿ ಬಿದ್ದಿಹೆನಿಲ್ಲಿ

ನನ್ನವರು ಯಾರಿಲ್ಲ

ಈ ಕ್ಷಣದಿ ಜೊತೆಯಲ್ಲಿ

ನಲ್ಲೆಯನು ಆತುಕೊಂಡು

ಜೊತೆಯಿದ್ದೆ ಕ್ಷಣ ಕ್ಷಣಕೂ

ಅವಳೆಲ್ಲೋ ನಾನೆಲ್ಲೋ

ಈಗೆಲ್ಲಿ ಆ ಬದುಕು?

ಇಬ್ಬರೂ ಜೊತೆ ಸೇರಿ

ಮಳೆ ಹನಿಯನು ಹೀರಿ

ನಮಗರಿವಿಲ್ಲದೆ ಮೂಡಿತ್ತು

ನಮ್ಮ ನಡುವೆ ಸ್ವಾತಿ ಮುತ್ತು

ಯಾರ ಹಂಗೂ ಇರದೆ

ನಾವು ನಮ್ಮಯ ಬದುಕು

ಹಿತವಾಗಿ ಇದ್ದೆವು

ಇರದೆ ಯಾವುದೆ ಬಿರುಕು

ಕ್ಷಣದಲ್ಲಿ ಮನುಜನ ಕೈಲಿ

ಇತ್ತು ನಮ್ಮ ಬದುಕು

ಮೃದ್ವಂಗಿ ಅವನೂಟದ ತುತ್ತು

ಮುತ್ತದುವೆ ಅವನ ನಲ್ಲೆಯ ಸೊತ್ತು

ಛಿದ್ರಗೊಂಡ ನಾನು

ಬಿದ್ದಿಹೆನು ಇಲ್ಲಿ...

ಬದುಕು ಶೂನ್ಯ

ಉಳಿದಿಲ್ಲ ಏನಿಲ್ಲಿ....

ಹೀಗೊಂದು ಪಯಣ...

2010-11-01T05:24:00.000-07:00

ದಿನವೂ ಅದೇ ಕಾಲೇಜು ಅದೇ ಹಾಸ್ಟೆಲ್.... bore ಬಂದು ,ಮನೆಗೆ ಹೋಗೋ ಮನಸ್ಸು ಮಾಡಿದೆ.ಹೊರಡಲು ಇನ್ನೆಷ್ಟು ಹೊತ್ತು..ಒಂದು ಜೊತೆ ಬಟ್ಟೆ ಒಂದು ಪುಸ್ತಕ ಈ ಬಾರಿ ಅದು ಭೈರಪ್ಪನವರ 'ದೂರ ಸರಿದರು' ಮತ್ತೆ ನನ್ನ boy friend(mobile) with earphoneಇಟ್ಕೊಂಡು ಹೊರಟೆ.ಬಸ್ ಹತ್ತಿ ಟಿಕೇಟ್ ಮಾಡಿಸಿ ಕುಳಿತೆ.ಸ್ವಲ್ಪ ಹೊತ್ತು 'ದೂರ ಸರಿದರು' ಓದಿದೆ ಮತ್ತೆ ಪುಸ್ತಕ ತೆಗೆದಿಟ್ಟು ಕುಳಿತವಳ ಮನದಲ್ಲಿ ನೂರಾರು ಯೋಚನೆಗಳು.ಯಾಕೋ friendship ಬಗ್ಗೆ ಯೋಚನೆ ಮಾಡ್ತಾ ಇದ್ದೆ.ಜೀವನದಲ್ಲಿ ಎಷ್ಟೋ ಜನ ಬಂದು ಹೋಗ್ತಾರೆ.ಅದರಲ್ಲಿ ಹಲವರು just friends,ಕೆಲವರು good friends,ಮತ್ತೆ ಇನ್ನೂ ಕೆಲವೇ ಕೆಲವರು ಮಾತ್ರ best friends ಆಗ್ತಾರೆ.ಆಗ್ತಾರೆ ಅನ್ನೋದಕ್ಕಿಂತ ನಾವು ಅಂದುಕೊಳ್ತೀವಿ.ಯೋಚನಾ ರೀತಿ,ನಮ್ಮ ಭಾವಕ್ಕೆ ಅವರ ಸ್ಪಂದನೆ ಹೀಗೆ ಹಲವನ್ನು ನಮಗೆ ತಿಳಿದ ರೀತಿಯಲ್ಲಿ ಅರ್ಥ ಮಾಡಿಕೊಂಡು friends ಅಂದುಕೊಳ್ತೀವಿ.ಆದರೆ ಎಲ್ಲಾ ವಿಷಯದಲ್ಲೂ ಅದು ನಿಜವಾಗಲೇಬೇಕು ಎಂದೇನೂ ಇಲ್ಲವಲ್ಲ.ಹಾಗೇ ಸುಳ್ಳಾಗಿರಬೇಕು ಅಂತಲೂ ಅಲ್ಲ.ಎಲ್ಲವೂ ನಮ್ಮ ದೃಷ್ಟಿಕೋನದ ಮೇಲೆ depend.ಎಲ್ಲರೂ ವಿಭಿನ್ನ ಅನ್ನಿಸ್ತಾರೆ.ಅರ್ಥ ಮಾಡಿಕೊಳ್ಳೋದು ತುಂಬಾ ಕಷ್ಟ.ಆದರೆ ಕೆಲವೊಮ್ಮೆ ಯಾಕೆ ಅರ್ಥವಾಗ್ತಾರೋ ಅನ್ನಿಸಿಬಿಡತ್ತೆ.ಮನೆಯಿಂದ ದೂರ ಇರುವವರಿಗೆ ಗೆಳೆಯರೆ ಬಂಧುಗಳು ಒಡಹುಟ್ಟಿದವರು ಎಲ್ಲಾ...ಆದರೆ ಈ dependency ಬಲಹೀನತೆಯಲ್ಲ.ಕತ್ತಲ ಹಾದಿಯಲ್ಲಿ ಬೆಳಕಾಗಿರುತ್ತಾರೆ ಅಂತಲ್ಲ.ಆದರೆ ಜೊತೆಗಿರುತ್ತಾರೆ ಅನ್ನೋ ನಂಬಿಕೆ ಅಷ್ಟೆ.ಆದರೆ ಕೆಲವೊಮ್ಮೆ ನಂಬೋಕೂ ಭಯ ಆಗತ್ತೆ.ಬಿಟ್ಟು ಹೋಗಿಬಿಟ್ಟರೆ ಅನ್ನೋ ಭಯ.ಕೆಲವು friends ಹಾಗೇ ಇರುತ್ತಾರೆ.ಕೆಲವರಿಗೆ ಅವರ life ಮಾತ್ರ ಮುಖ್ಯ.ಕೆಲವರದ್ದು ತೀರಾ hurt ಮಾಡೊ nature,ಗೆದ್ದವರ ಜೊತೆ ಇದ್ದು ಹೆಸರು ಮಾತ್ರ ಬೇಕು ಅನ್ನೋರು,ತೀರಾ ಕೆಲವರು ಮಾತ್ರ ನಮ್ಮ worst situations ಅಲ್ಲೂ ಜೊತೆ ಇರುತ್ತಾರೆ.ಅಬ್ಬಬ್ಬಾ ಎಷ್ಟೊಂದು ರೀತಿಯ ಜನಗಳು...ಹಾಗಾದ್ರೆ ನಿಜವಾದ friendಯಾರು? friendship ಅಂದರೆ ಏನು?...ಹೀಗೆ ಏನೇನೋ ಯೋಚಿಸುತ್ತಿದ್ದವಳಿಗೆ ಪುಟ್ಟ ಮಗುವಿನ ಕೈ ತಾಗಿತು,..ಆಗ ನಾನು ವಾಸ್ತವಕ್ಕೆ ಬಂದೆ.ನನ್ನ ದುಪಟ್ಟಾ ಹಿಡಿದುಕೊಂಡ ಪುಟ್ಟ ಪಾಪು ಅದರ ಅಪ್ಪನ ಜೊತೆ ನನ್ನ ಪಕ್ಕದ seatನಲ್ಲಿ ಕುಳಿತಿತ್ತು.ನಂಗಂತೂ ಪುಟ್ಟ ಮಕ್ಕಳು ಅಂದ್ರೆ ಪ್ರಾಣ....ಅಲ್ಲದೇ ಮಕ್ಕಳೂ ನನ್ನ ಬೇಗ ಹಚ್ಚಿಕೊಂಡುಬಿಡ್ತಾರೆ.ನಾನು ಪಾಪು ಬೇಗ friends ಆದ್ವಿ.ಪಾಪುವಿನ ಅಪ್ಪನ ಬಳಿ ಅದರ ಹೆಸರು ಕೇಳಿದೆ.ಅದಕ್ಕವರು ಇವಳ ಹೆಸರು 'ಪ್ರಮದಾ'ನಮ್ಮ ಎಂದರು.ಎಲ್ಲರ ಹೆಸರಿನ ಅರ್ಥ ತಿಳಿಯುವ ಆಸಕ್ತಿಯಿದ್ದರಿಂದ ಹೆಸರಿನ ಅರ್ಥ ಕೇಳಿದೆ.ಅದಕ್ಕೆ ಅವರು 'ಪ್ರಮದೆ' ಎಂದರೆ ಹೆಣ್ಣು ಎಂದರ್ಥ,'ಪ್ರಮದ' ಎಂದರೆ ಸಂತೋಷ ಅಂತಲೂ ಅರ್ಥ ಇದೆ.ಈ ಪುಟಾಣಿನೆ ನನ್ನ ಸಂತೋಷ' ಎಂದರು...
ಅದಕ್ಕೆ ನಾನು ಯಾಕೆ ಹೀಗೆ ಅಂತ ಹೇಳ್ತೀರಾ ನಿಮಗೇನೂ ಅಭ್ಯಂತರವಿಲ್ಲದಿದ್ದರೆ ಎಂದೆ.ಅದಕ್ಕೆ ಅವರು ಹೇಳ್ತೀನಮ್ಮಾ ಕೇಳುವ ತಾಳ್ಮೆ ಇದೆಯಾ ಮಗಳೇ ಎಂದರು.ಹೇಳಿ ಎಂದೆ.ಅದಕ್ಕೆ ಅವರು ಹೇಳಲಾರಂಭಿಸಿದರು.
'ಹಲವು ವರ್ಷಗಳ ಹಿಂದಿನ ಮಾತು, ಆಗ ನಾನು PU ಓದುತ್ತಿದ್ದೆ.ನಾನು ಮತ್ತೆ ಪ್ರತಿಮಾ ಒಳ್ಳೆಯ ಸ್ನೇಹಿತರು.ಅವಳು ಸಂಪ್ರದಾಯಸ್ಥ ಮನೆಯ ಹುಡುಗಿ.ತುಂಬಾ ಮುಗ್ಧೆ,ಹಾಗೆ emotional ಕೂಡ.ಆದರೆ ತುಂಬಾ ಮುಂಗೋಪಿ.ಏನಾಗಿದೆ ಎಂದು ಯೋಚಿಸದೆ ನಿರ್ಧರಿಸುವ ದುಡುಕು ಸ್ವಭಾವ.ನಮ್ಮ ನಡುವೆ ಯಾವುದೇ ಮನಸ್ತಾಪಗಳಿರಲಿಲ್ಲ.True friends ಅಂತಾರಲ್ಲ ಹಾಗೆ ಇದ್ವಿ ನಾವು.ಒಮ್ಮೆ ಮಾತ್ರ ನನ್ನ ಬಳಿ ಬಂದವಳೇ 'ನೀನು ಹೀಗೆಲ್ಲಾ ಮಾತನಾಡ್ತೀಯಾ ಅಂತ ಗೊತ್ತಿರಲಿಲ್ಲ'ಎಂದು ಮುಖ ಕೆಂಪಗೆ ಮಾಡಿಕೊಂಡು ಹೇಳಿ ಹೊರಟುಹೋದಳು.ನಾನು ಯಾಕೆ ಏನಾಯ್ತು?ಎಂದು ಎಷ್ಟು ಕೂಗಿ ಕೇಳಿದರೂ ನಿಲ್ಲದೆ ಹೊರಟುಹೋದಳು.ಕಾರಣವನ್ನು ತಿಳಿಯಬೇಕಿತ್ತು.ಎಷ್ಟು ಪ್ರಯತ್ನಿಸಿದರೂ ಅದು ಸಾದ್ಯವಾಗಲೇ ಇಲ್ಲ.2nd PU ಆಗಿದ್ದರಿಂದ studyಅಲ್ಲಿ busy ಆಗಿಹೋದೆ.ಆಮೇಲೆ ಬಳ್ಳಾರಿಯಲ್ಲಿ medical seatಸಿಕ್ಕಿ ಅಲ್ಲಿಗೆ ಹೋದೆ.ಅಲ್ಲಂತೂ ಓದಲು ಬ್ರಹ್ಮಾಂಡದಷ್ಟಿರುತ್ತಿತ್ತು.ಆದರೂ ಕೆಲವೊಮ್ಮೆ ಗೆಳತಿಯ ನೆನಪಾಗುತ್ತಿತ್ತು.ಮನಸು ಕಾರಣವ ಹುಡುಕುತ್ತಿತ್ತು.ಆಗೆಲ್ಲಾ ಸುಮ್ಮನೆ ಹಾಳೆಯ ಮೇಲೆ 'ಹೇಳಿ ಹೋಗು ಕಾರಣ ಹೋಗುವಾ ಮೊದಲು' ಎಂದು ಗೀಚುತ್ತಿದ್ದೆ..ಸ್ನೇಹಿತರೆಲ್ಲಾ ನಗುತ್ತಿದ್ದರು..'ಇವನಿಗೆ ಏನೋ ಆಗಿದೆ ಕಣ್ರೊ' ಅನ್ನುತ್ತಿದ್ದರು...ಕಾಲ ಎಲ್ಲವನ್ನೂ ಮರೆಸುತ್ತದೆ ಎಂದು ತಿಳಿದೋರು ಹೇಳ್ತಾರೆ.ಆದರೆ ಕೆಲವೊಂದು....ಮರೆಯಲು ಅಸಾಧ್ಯ...ಕ್ರಮೇಣ ಹಳೆಯ ನೆನಪನ್ನು ಮರೆಯಲು ಪ್ರಯತ್ನಿಸುತ್ತಾ ಹೊಸ ಬದುಕನ್ನಾರಂಭಿಸಿದೆ.ನನ್ನ ವೃತ್ತಿ ಜೀವನವನ್ನ ಶಿವಮೊಗ್ಗದಲ್ಲಿ ಆರಂಭಿಸಿದೆ.ಕೆಲವು ದಿನಗಳಲ್ಲಿ ನಾನು ನಿರೀಕ್ಷಿಸದ ಒಂದು ಘಳಿಗೆ ನನ್ನ ಬಾಳಲ್ಲಿ ಬಂದಿತ್ತು.ಅದು ನನ್ನ ಹಾಗೂ ಪ್ರತಿಮಾಳ ಭೇಟಿ.ಅವಳು scanning ಗೆ ಎಂದು ಬಂದಿದ್ದಳು.ಸಂಸಾರ ಅವಳನ್ನು ಸಾಕಷ್ಟು ಹಣ್ಣು ಮಾಡಿತ್ತು...ಒಳಬಂದವಳೇ 'ದಿವಾಕರಾ ನೀನಾ?ನಂಬೋಕೇ ಆಗ್ತಿಲ್ಲಾ ಕಣೋ.. ನಿನ್ನದಲ್ಲದ ತಪ್ಪಿಗೆ ನಾನು ನಿನಗೆ ಬೈದಿದ್ದೆ.'ನಮ್ಮ classನ ನೀರಜಾ ಅದೇ ತಂದೆಯಿಲ್ಲದ ಹುಡುಗಿ...ಅವಳ ಬಗ್ಗೆ ದಿವಾಕರ ಹೀಗೆ ಮಾತನಾಡಬಾರದಿತ್ತು ಪಾಪ ಆ ಹುಡುಗಿ college ಬಿಟ್ಟಳಂತೆ' ಎಂದು ನಮ್ಮ classmates ಮಾತನಾಡೊದನ್ನ ಕೇಳಿ ಆ ದಿವಾಕರ ನೀನೇ ಎಂದುಕೊಂಡು ನಿನಗೆ ಬೈದೆ.ಆಮೇಲೆ ನಂಗೆ ಗೊತ್ತಾಯ್ತು ಅದು ನಮ್ಮ ದಿವಾಕರ್ sir ಅಂತ.ನಂಗೇನು ಗೊತ್ತು ಅವರು sirಗೆ ಏಕವಚನದಲ್ಲಿ ಕರಿತಾರೆ ಅಂತ....ಆಮೇಲೆ ತುಂಬಾ ಬೇಜಾರಾಯ್ತು.ನನ್ನ ದುಡುಕು ಸ್ವಭಾವದಿಂದ ಒಳ್ಳೆಯ ಗೆಳೆಯನನ್ನ ಕಳೆದುಕೊಂಡೆ ಅಂತ...ನೀನು ಮತ್ತೆ ಸಿಗ್ತೀಯಾ ಅಂತ ಅಂದುಕೊಂಡೆ ಇರಲಿಲ್ಲ.ಒಳ್ಳೆಯದಾಯ್ತು ಸಿಕ್ಕಿದ್ದು.sorry ಕಣೋ..' ಎಂದಳು.ಆಮೇಲೆ ಹೀಗೇ ಹಳೆಯ ಸುದ್ದಿಗಳನ್ನೆಲ್ಲ ಮಾತನಾಡಿದೆವು.ಮಾತನಾಡುತ್ತಲೇ ಅವಳಿಗೆ scanning ಮಾಡಿದೆ.ಹಳೆಯ ಗೆಳತಿಯು ಸಿಕ್ಕ ಖುಷಿಯಲ್ಲಿ ಹೇಳಿಬಿಟ್ಟೆ ನಿನ್ನ ಹೊಟ್ಟೆಯಲ್ಲಿ ಪುಟ್ಟ angel ಇದಾಳೆ ಅಂತ.ಏನಾಯಿತೋ ಏನೋ ಪ್ರತಿಮಾ ಬಿಕ್ಕಳಿಸಲಾರಂಭಿಸಿದಳು.ಯಾಕೆ ಎಂದು ಕೇಳಿದೆ,ಅದಕ್ಕವಳು ನನ್ನ ಕೈ ಹಿಡಿದುಕೊಂಡು' ದಿವಾಕರಾ ನಂಗೆ abortion ಮಾಡಿಸೋ please'ಎಂದಳು.
ಅದಕ್ಕೆ ನಾನು 'ನಿನಗೇನಾಗಿದೆಯೇ?ಮಗು ಆರೋಗ್ಯವಾಗಿದೆ.ಆದರೂ ಯಾಕೆ ಹೀಗೆಲ್ಲಾ ಮಾತಾಡ್ತಿದೀಯಲ್ಲಾ' ಎಂದೆ.ಅದಕ್ಕೆ ಪ್ರತಿಯಾಗಿ ಅವಳು.'ಈಗ ಆರೋಗ್ಯವಾಗಿಯೇ ಇದೆ.ಆದರೆ ಹೊರಬಂದರೆ ಅದರ ಪಾಡು ನಿನಗೆ ಗೊತ್ತಿಲ್ಲ.ಮೊದಲನೆಯ ಮಗು ಹೆಣ್ಣು ಅಂತ ಯಾರೂ ಅದರ ಮುಖವನ್ನೇ ನೋಡಿರಲಿಲ್ಲ.ಈ ಮಗುವೂ ಹೆಣ್ಣು ಎಂದಾದರೆ...ಏನಾಗಬಹುದು ಒಮ್ಮೆ ಯೋಚಿಸು...ಅದಕ್ಕೇ ನಾನು ಹೀಗೆ ಹೇಳಿದ್ದು.ಯಾವ ತಾಯಿಯೂ ಹೀಗೆ ಹೇಳಲ್ಲ.ಆದರೆ ಪ್ರತಿದಿನವೂ ನೋವುಂಡು ಬದುಕುವುದಕ್ಕಿಂತ ಇದು ಉತ್ತಮ ಅನ್ನಿಸಿತು.ಕ್ರಾಂತಿಯ ಮಾತುಗಳೆಲ್ಲ ಆ ದಿನಕ್ಕೇ ಮುಗಿದುಹೋಯ್ತು.ಈಗ ಏನೂ ಮಾಡೋಕಾಗಲ್ಲ.ಪ್ರತಿ ಹೆಜ್ಜೆ ಹೆಜ್ಜೆಗೂ ಭವಿಷ್ಯದ ಯೋಚನೆ ಮಾಡಲೇಬೇಕು.' ಎಂದಳು.ಮುಂಗೋಪಿ ಹುಡುಗಿಗೆ ಬದುಕು ಅದೆಷ್ಟು seriousness ಕಲಿಸಿದೆ ಎನ್ನಿಸಿತು.ಅವಳಿಗೆ ಸಮಾಧಾನ ಮಾಡಿ,ಏನೂ ಯೋಚನೆ ಮಾಡಬೇಡ.ನನ್ನ ಹಾಗೂ ನಮ್ಮ ಸ್ನೇಹದ ಮೇಲೆ ನಿನಗೆ ನಂಬಿಕೆ ಇದ್ದರೆ ಆ ಮುಗ್ಧ ಜೀವವನ್ನು ಕೊಲ್ಲುವ ಯೋಚನೆ ಬಿಡು,ನಿನ್ನ ಪಾಡಿಗೆ ನೀನಿರು.ಮನೆಯಲ್ಲಿ ಯಾರಿಗೂ ಈ ವಿಷಯ ಹೇಳದೆ ನಿನಗೇನೂ ಗೊತ್ತಿಲ್ಲ ಎಂಬಂತೆ ಆರಾಮವಾಗಿರು ಎಂದೆ.ಹೋಗುವ ಮುನ್ನ ಹೆರಿಗೆಗೆ ನಮ್ಮ ಆಸ್ಪತ್ರೆಗೇ ಬಾ ಎಂದು ಹೇಳಿ ಕಳುಹಿಸಿದೆ.ಅವಳ ಹೆರಿಗೆಯ ದಿನ ಬಂದೇಬಿಟ್ಟಿತು.ಅವಳು ಬಂದಕೂಡಲೇ ನಾ ಅವಳನ್ನು ಕರೆದು'ನಿನ್ನ ಮಗು ಬದುಕಿರುವುದು ನಮ್ಮಿಬ್ಬರಿಗೆ ಮಾತ್ರ ಗೊತ್ತು.ಲೋಕದ ಕಣ್ಣಿಗೆ ಅದು ಬದುಕಿಲ್ಲ.ಹೆರಿಗೆಯ ಸಮಯದಲ್ಲಿ ಮಗು ಉಳಿಯಲಿಲ್ಲ ಎಂದು ನಾ ನಿಮ್ಮ ಮನೆಯವರಿಗೆ ಹೇಳುತ್ತೇನೆ.ಈ ಪುಟ್ಟ angel ನನ್ನ ಜೊತೆಗಿರಲಿ ನಮ್ಮ ಪರಿಶುದ್ಧ ಸ್ನೇಹದ ಕುರುಹಾಗಿ...ಇಲ್ಲ ಎನ್ನಬೇಡ ಎಂದೆ.ಅವಳ ಕಣ್ಣಲ್ಲಿ ನೀರಿತ್ತು.ಆ ನೋವಲ್ಲೂ ಖುಷಿಯಿತ್ತು.ನನ್ನ ಮಾತಿಗೆ ಅವಳ ಸಂಪೂರ್ಣ ಸಹಮತವಿತ್ತು.ಮುಂದೆಲ್ಲಾ ನಾನು ಅಂದುಕೊಂಡಂತೆಯೆ ಆಯಿತು.'ಮಗು ಉಳಿಯಲಿಲ್ಲ ಹೆಣ್ಣುಮಗು 'ಎಂದು ಹೆಳಿದಾಗ ಪ್ರತಿಮಾಳ ಮನೆಯವರ ಮುಖದಲ್ಲಿ ಪೀಡೆ ತೊಲಗಿತೆಂಬ ಭಾವ...ಆ ಕ್ಷಣದಲ್ಲಿ 'ನಾವೆಲ್ಲ ಅಮ್ಮನನ್ನು ಗೌರವಿಸ್ತೀವಿ...ಆದರೆ ಹೆಣ್ಣುಮಗು ಎಂದರೆ ಯಾಕೆ ಹೀಗೆ' ಅನ್ನಿಸಿತು.transfer ತಗೊಂಡೆ.ನನ್ನ angel ಮತ್ತೆ ನಾನು ..ಹೀಗೆ ಬದುಕು ಸಾಗುತ್ತಿದೆ.ಯಾವ ಗಂಡುಮಗುವಿಗೂ ಕಡಿಮೆಯಿಲ್ಲದ ಹಾಗೆ ನಾನು ಇವಳನ್ನ ಬೆಳೆಸ್ತೀನಿ...ಅಯ್ಯೋ ತುಂಬಾ ಮಾತನಾಡಿಬಿಟ್ಟೆ ಬೇಜಾರಾಗಬೇಡಮ್ಮಾ ಯಾಕೋ ನಿನ್ನ ಬಳಿ ಹೇಳಬೇಕು ಅನ್ನಿಸಿತು' ಎಂದು ಮಾತು ಮುಗಿಸಿದರು.ನಾನು 'ಎಲ್ಲಾ ಸರಿ ಮುಂದೆ ನಿಮ್ಮ life partner ಏನಾದ್ರೂ ಅಂದ್ರೆ ಅಥವಾ ನಿಮ್ಮ ಮನೆಯಲ್ಲಿ ಏನಾದ್ರೂ ಅಂದ್ರೆ ಏನ್ ಮಾಡ್ತೀರಾ uncle' ಎಂದೆ.ಅವರು'ನಮ್ಮನೆಲಿ ಈಗ ಇರೋದು ನಾನು ಮತ್ತೆ ಪ್ರಮದಾ ಮಾತ್ರ.ನನ್ನ parents ತೀರಿಕೊಂಡು ಕೆಲವು ವರ್ಷಗಳೇ ಆಗಿಹೋಯ್ತು.ಇನ್ನು ಮದುವೆ ಸಂಸಾರದ ಬಗ್ಗೆ ನನಗೆ ಆಸಕ್ತಿ ಇಲ್ಲ.ಇದ್ದಾಳಲ್ಲಾ angel....ಇವಳೇ ನನ್ನ ಬದುಕು.'ಎಂದು ಅವಳನ್ನ ಮುದ್ದಿಸಿದರು.
ಅವರು ಇಳಿಯುವ stop ಬಂತು.ತಮ್ಮ visiting card ಕೊಟ್ಟು ಇಳಿದು ಹೋದರು.ಇವತ್ತಿನ journey memorable ಆಗಿತ್ತು.ಕೆಲವು ಸಮಯದ ಹಿಂದೆ ಅಂದ್ರೆ friendship ಏನು ಅಂದುಕೊಳ್ತಿದ್ದೆ ....ಅದಕ್ಕೆ ಉತ್ತರ ಸಿಕ್ಕಿತ್ತು....ಆದರೆ ಅದನ್ನ ಹೇಳೊಕೆ...impossible.....friendship ಅಂದ್ರೆ....ಮಾತಿಗೆ ನಿಲುಕದ್ದು....ಎಂದುಕೊಂಡು bus ಇಳಿದು ಮನೆಯಕಡೆ ಕಾಲು ಹಾಕಿದೆ

ನಿನಗಿನ್ನೇನ ಹೇಳಲಿ ....

2010-09-27T11:10:00.000-07:00

ಅಮ್ಮಾ....ಇದು ನಿನಗೆ.... ಈ ನಿನ್ನ ಕೂಸಿನ ಅರ್ಪಣೆ......

ನಾ ಭುವಿಗೆ ಬರುವ ದಿನಕೆ

ನೀ ಕಾದಿದ್ದೆ ಕ್ಷಣ ಕ್ಷಣ

ಪ್ರತಿ ಸ್ಪರ್ಶವ ಆಸ್ವಾದಿಸಿ

ನಲಿದಿತ್ತು ನಿನ್ನ ಮನ..

ಹೇಳಲಾರದ ಭಾವ

ಮುರಿಯಲಾರದ ಬಂಧ...

ನಿನಗಿನ್ನೇನ ಹೇಳಲಿ

ಅಮ್ಮಾ ಎಂದಲ್ಲದೆ...

ಮೊದಲ ಮುತ್ತು

ಮೊದಲ ತುತ್ತು

ಮೊದಲ ಪೆಟ್ಟು

ಎಲ್ಲ ಮೊದಲುಗಳ ಮೊದಲು..

ನೀನೆ ತಾನೇ

ನಿನಗಿನ್ನೇನ ಹೇಳಲಿ ಅಮ್ಮಾ ಎಂದಲ್ಲದೆ...

ನನ್ನ ನೋವಿಗೆ

ನಿನ್ನ ಸ್ಪಂದನೆ

ನನ್ನ ಏಳ್ಗೆಗೆ ಪ್ರತಿಕ್ಷಣವು ಚಿಂತನೆ

ನನಗೆ ಎಲ್ಲವು ನೀನೇ ತಾನೇ

ನಿನಗಿನ್ನೇನ ಹೇಳಲಿ ಅಮ್ಮಾ ಎಂದಲ್ಲದೆ

ನಡೆಯ ಕಲಿಸಿ

ನುಡಿಯ ಕಲಿಸಿ

ಬೊಗಸೆ ಕಂಗಳ ಕನಸು..

ನನಗೆ ಕೇಳದೆ ನನಸು ಮಾಡಿದವಳು..

ನೀನೇ ತಾನೇ..

ನಿನಗಿನ್ನೇನ ಹೇಳಲಿ ಅಮ್ಮಾ ಎಂದಲ್ಲದೆ

ನನ್ನುಸಿರಿನ ಮೊದಲಿಂದ

ನಿನ್ನುಸಿರ ಕೊನೆಯವರೆಗೂ

ನನಗಾಗಿ ಬದುಕುವವಳು

ನೀನೇ ತಾನೇ

ನಿನಗಿನ್ನೇನ ಹೇಳಲಿ ಅಮ್ಮಾ ಎಂದಲ್ಲದೆ...

ಒಮ್ಮೆ ಯೋಚಿಸು...

2010-09-08T08:46:00.000-07:00

ಮನವು ಖಾಲಿ ಹಾಳೆ
ಒಮ್ಮೆ ಯೋಚಿಸು ನೀ
ಗೀಚುವಾ ಮುನ್ನ

ಗೀಚಿದ ಗೆರೆಯಳಿಸಿದರೂ
ಅಚ್ಚು ಉಳಿದುಹೋಗುವುದು
ಮತ್ತೆ ತಿದ್ದಲು ಹೋದರೆ
ಗಾಯವಾಗುವುದು

ಹಸಿಮಣ್ಣಿನ ನೆಲದಿ ಇಟ್ಟ
ಹೆಜ್ಜೆಯಂತೆ ಇದುವೆ...
ಒಮ್ಮೆ ಮೂಡಿದ ಗುರುತು
ಉಳಿದುಹೋಗುವುದು

ಬದುಕ ಹಾಳೆಯಲಿ
ನೂರಾರು ಬರಹಗಳು
ಒಬ್ಬೊಬ್ಬರದ್ದು
ಒಂದೊಂದು ಶೈಲಿ

ಮರೆಯದಿರು ನೀನು
ಪ್ರತಿ ಬರಹವು ಭಿನ್ನ
ಹೇಗೆ ತಾನೇ ಮರೆಯಲಿ
ನಿನ್ನ ಆ ಕೈ ಬರಹವನ್ನ

ಒಮ್ಮೆ ಯೋಚಿಸು ನೀ ಗೀಚುವಾ ಮುನ್ನ...
ನಿನ್ನ ಗೀಚಿಗೆ ಗೀರಾಗುವುದು ನನ್ನ ಮನ...

ನನ್ನವನು......!!!??

2010-09-02T06:55:00.000-07:00

ಸುಮ್ಮನೆ ಕುಳಿತವಳ
ಮುಂಗುರುಳ ಸವರಿ
ಕಚಗುಳಿಯಿಡುವ
ಕಳ್ಳನಿವನು

ಜೊತೆಯಿರುವೆನೆಂಬ
ಪೊಳ್ಳು ಭರವಸೆಯ ಕೊಡದೆ
ಹೇಳದೆಯೂ ಜೊತೆಯಿದ್ದ
ಜೊತೆಗಾರನಿವನು

ಮಾಗಿ ಮುಂಜಾನೆಯಲಿ
ಮೌನದ ರಾತ್ರಿಯಲಿ
ರೋಮಾಂಚನದಿ ನಶೆಯೇರಿಸುವ
ತುಂಟನಿವನು

ಕತ್ತಲಲಿ ಬೆದರಿ
ಕಂಬನಿಯ ಮಿಡಿವಾಗ
ಮಾತಿಲ್ಲದೆ ಆ ಕಂಬನಿಯ
ಒರೆಸಿದವನು...

ತಂಗಾಳಿಯಂತೆ ಬಂದು
ಬಿರುಗಾಳಿಯೆಬ್ಬಿಸಿ ಹೋದ
ನೆನಪಿನ ಧೂಳೆರಚಿ
ನನ್ನ ಅಳಿಸಿದವನು....
ನನ್ನವನು.......ತಂಗಾಳಿ......!!!???

ಏನ ಹೇಳಲಿ ಈ ಬಂಧಕೆ....

2010-08-25T08:46:00.001-07:00

ಹೆಸರಿಲ್ಲದಾ ಜಾಗ
ಹೆಸರಿಲ್ಲದಾ ಬಂಧ
ಅರ್ಥವ ಹುಡುಕುತಾ
ನಿಂತಿಹೆನು ಇಲ್ಲಿ

ಲೋಕದಾ ಮಾತಿಗೆ
ಮೌನದಿ ಬಿಕ್ಕಳಿಸಿ
ಕೂಗಿಹೇಳಲಾಗದೆ ಸೋತಿಹೆ
ಮೌನವೇ ಲೇಸಿಲ್ಲಿ

ಕಳೆದುಹೋಗಿದ್ದೆ ನಾ
ಸ್ವಾರ್ಥಿಗಳ ಲೋಕದಲಿ
ದಾರಿಯಾ ಹುಡುಕುತ
ನಿಂತಿದ್ದೆ ಗೊಂದಲದಲಿ

ನಿನ್ನ ನೋಟಕೆ
ಬೆಚ್ಚಿದ್ದೆ ಒಂದು ಕ್ಷಣ
ಅಲ್ಲೇ ಆ ನೋಟದಲೇ ಎನ್ನಂತರಂಗವ
ಅರಿತಿತ್ತು ನಿನ್ನ ಮನ

ಜೊತೆ ನಡೆದ
ಕ್ಷಣಗಳೆಷ್ಟೋ
ಸಾಗಿ ಬಂದ
ದೂರವೆಷ್ಟೋ

ನೋಡಿ ನಕ್ಕರು
ಹುಚ್ಚು ಎಂದರು
ಮತ್ತೆ ಕೆಲವರು
ಪ್ರೇಮವೆಂದರು

ಹೇಗೆ ಹೇಳಲಿ
ನಮ್ಮ ಬಂಧದರ್ಥವ
ವಾತ್ಸಲ್ಯಮಯ
ಈ ಅನುಬಂಧವ

ಮತ್ತೆ ಯೋಚಿಸಿ
ಮನವ ಶೋಧಿಸಿ
ಅರ್ಥ ಹುಡುಕಿ ಹೆಸರ ನೀಡಿ ಬಂಧಿಸಿದೆ
ಅದುವೆ ಈ ‘ರಕ್ಷಾಬಂಧನ’

ನಕ್ಕ ಜಗವು
ಮೆಚ್ಚುವ ಬಂಧವಿದು

ಪುಟ್ಟ ದಾರ
ಮಮತೆ ಅಪಾರ...

ಮತ್ತೆ ಬಂದಿದೆ....

2010-08-15T05:32:00.000-07:00

ಮತ್ತೆ ಬಂದಿದೆ ೧೫ ಆಗಸ್ಟು,

ಎಲ್ಲರ ಎದೆಯಲಿ ದೇಶಾಭಿಮಾನ, ಶಿಸ್ತು,

ಕೆಲವು ದಿನಗಳು ಮಾತ್ರ ಕೇಸರಿ ,ಬಿಳಿ ,ಹಸಿರು

ನಮ್ಮೆಲ್ಲರ ಉಸಿರು...

ನಂತರ??

ಯಾರಿಗೆ ಗೊತ್ತು?

ನಮ್ಮ ಅಭಿಮಾನದ ಪ್ಲಾಸ್ಟಿಕ್ ಧ್ವಜ..

ಕಸದಬುಟ್ಟಿಯ ಸೊತ್ತು.

ಬೇಕೇ ಈ ತಾತ್ಕಾಲಿಕ ಅಭಿಮಾನ?

ತೋರೋಣ ಸ್ವಾಭಿಮಾನ,

ಎಲ್ಲರ ಹಿಡಿದೆತ್ತೋಣ..

ಒಂದಾಗಿ ಮುನ್ನಡೆಯೋಣ....

‘some’ಬಂಧ

2010-08-14T22:04:00.000-07:00

ಜೀವನದಲ್ಲಿ ಬರುವ ‘some’ಬಂಧಗಳ ಬಗ್ಗೆ ಹೀಗೆ ಗೀಚಿದ್ದು........

ನವಿರಾದ ಎಳೆಮೇಲೆ
ಸಂಭ್ರಮದ ತೋರಣವ ಹೇರಿ
ಹಬ್ಬದಾಚರಣೆಯ
ಕನಸು ಕಟ್ಟಿದ್ದೆ

ಅಕ್ಕರೆಯ ಸಕ್ಕರೆಯ
ಮಾತಿಗೆ ಬೆರಗಾಗಿ
ಮನಬಿಚ್ಚಿ ನಲಿದಾಡಿ
ಸಂತಸದಿ ನಾನಿದ್ದೆ

ಮರಳ ಹಾದಿಯಲಿರುವ
ಮರೀಚಿಕೆಯದೆಂದು
ಅರಿವಾಯಿತೆನಗೆ
ಬಹಳ ತಡವಾಗಿ

ಸವಿ ಮಾತ ಅರಸುತ್ತ
ನಂಬಿ ಮುನ್ನಡೆಯುತ್ತ
ಅರಿವಿಲ್ಲದೆ ಜೇನುಗೂಡಿನಲಿ
ಕೈ ಇಟ್ಟಿದ್ದೆ ನಿನಗಾಗಿ

ಮೆಚ್ಚಬೇಕು ನಿನ್ನ ಕಲೆಯ
ನಾಜೂಕಾಗಿ
ಜೇಡದಂತೆ ಹೆಣೆವೆ
ಸಂಬಂಧದ ಬಲೆಯ

ಬಲೆಗೆ ಬಿದ್ದು ನರಳುವರ ಕಂಡು
ಎಳೆ ಹರಿದು ಮರುಗುವರ ಕಂಡು
ನಸು ನಕ್ಕು
ಅಂಟಿಯೂ ಅಂಟದೆ ಮತ್ತೆ ಬಲೆ ಹೆಣೆವ
ನಿನ್ನ ಕ್ರೌರ್ಯಕೆ ಏನ ಹೇಳಲಿ....

ನೆನಪಿನ ಹನಿ...

2010-08-08T04:54:00.001-07:00

'ಬಾಲ್ಯ ಅನ್ನೋದು ಅವಿಸ್ಮರಣೀಯ.ಎಲ್ಲರೂ ಮತ್ತೆ ಬಾಲ್ಯವನ್ನ ಮೆಲುಕು ಹಾಕೋದು ಸಹಜ...ಮಳೆಗಾಲದಲ್ಲಿ ತಂಗಿಗೆ ಮೂಡುವ ಅಣ್ಣನ ನವಿರಾದ ನೆನಪಿನ ತುಂತುರು ಇಲ್ಲಿದೆ.'

ಬಿಸಿಬಿಸಿ coffie ಕುಡಿತಾ ಕೂತಿದ್ದೆ....ಹೊರಗೆ ಮಳೆ ಜೋರಾಗಿ ಬರ್ತಿತ್ತು....ಬಾಗಿಲು ಹಾಕದೇ ಬಂದಿದ್ದು ನೆನಪಾಗಿ ಓಡಿ ಬಂದೋಳಿಗೆ ಯಾಕೋ ಮಳೆಯಲ್ಲಿ ನೆನೆಯೋ ಆಸೆ ಆಯ್ತು....ಮುಖದ ಮೇಲೆ ಪಟಪಟನೆ ಮಳೆಹನಿ ಬೀಳುತ್ತಿದ್ದಂತೆ ಮನಸಲ್ಲಿ ನೆನಪಿನಾ ಮಳೆ....

ಗುಡುಗಿನಾ ಸದ್ದು ಕೇಳಿ ‘ಗುಡುಗುಮ್ಮ ಬಂದ..ಹೆಡಿಗೆ ತಂದ...ಭತ್ತ ಬೇಡ ಅಂದ ಅಡಿಕೆ ಬೇಡ ಅಂದ...ನಮ್ಮ ಪುಟ್ಟಿನೆ ಬೇಕು ಅಂದ.’ಗುಡುಗಿಗೆ ಗುಮ್ಮನ ರೂಪ ಕೊಟ್ಟು ಅಜ್ಜ ನಮ್ಮನ್ನು ಮಲಗಿಸ್ತಿದ್ದಿದ್ದು....ನಾವೇನು ಕಮ್ಮಿ.....ಅಜ್ಜನ ಮಲಗಿಸಿ ನಾವು ಓಡಿ ಬರೋದು.. ಯಾರಿಗೂ ಗೊತ್ತಾಗದಂತೆ ಅಟ್ಟಕ್ಕೆ ಹೋಗಿ ಆಟ ಆಡಿದ್ದು....ಶಾಲೆಯಿಂದ ಬರುವಾಗ ನೀರಾಟ ಆಡಬೇಕು ಅಂತಾನೆ ಸುತ್ತಿ ಬಳಸಿದ ದಾರೀಲಿ ಬರೋದು..ಅಲ್ಲಿ ಹರಿವ ನೀರಲ್ಲಿ ಪುಟ್ಟ ಪುಟ್ಟ ಹೆಜ್ಜೆ ಇಟ್ಟು..ಆಟ ಆಡ್ತಾ...ಪುಟಾಣಿ ಜಲಪಾತಕ್ಕೆ ನಮ್ಮದೇ ಹೆಸರು ಕೊಡ್ತಾ..ಮತ್ತೆ ಈ ಭಾನುವಾರ ಎಲ್ಲಿ ಹೋಗೋದು ಅಂತಾ plan ಮಾಡ್ತಾ ಮನೆಗೆ ಬರೋಹೊತ್ತಿಗೆ ಮೈ ಎಲ್ಲ ಒದ್ದೆ....ಅಮ್ಮ ದೊಡ್ಡಮ್ಮ ಸ್ವಲ್ಪ ಮಂಗಳಾರತಿ ಮಾಡ್ತಿದ್ರೂ ಅಣ್ಣ ನಾನು ಮುಖ ಮುಖ ನೋಡ್ಕೊಂಡು ನಗ್ತಾ ಚೇಷ್ಟೆ ಮಾಡೋದ ನೋಡಿ ಅವರಿಗೂ ನಗು ಬರ್ತಿತ್ತು....

‘ಅಣ್ಣನದು ಸ್ನಾನ ಆಯ್ತು ಬೇಗ ಹೋಗೆ ಶಾಲೆಗೆ ಹೊತ್ತಾಯ್ತು...’ಅಂತ ಅಮ್ಮ ಕೂಗಿದ್ಮೇಲೆ ಕಣ್ಣುಜ್ಜುತ್ತಾ ಹಾಗೆ ಸ್ನಾನಕ್ಕೆ ಓಡಿದ್ದು...ತಿಂಡಿಗೆ ಕೂತರೆ ಅಂತು ಮುಗಿತು...ನಿನ್ನೆ ನನ್ನ ಕನಸಲ್ಲಿ ಹಾಗೆ ಹೀಗೆ ಅಂತಾ ಕತೆಹೊಡಿತಿದ್ದೊರು ಅಪ್ಪ ಬಂದ್ರೆ ಮಾತ್ರ ಗಪ್ ಚುಪ್...ಆಮೇಲೆ ಶಾಲೆಲಂತೂ ನಾವೇ donಗಳು..ಹೇಳೋರಿಲ್ಲ ಕೇಳೋರಿಲ್ಲ...ಕಳ್ಳ ಪೋಲಿಸ್ ಆಟ ಆಡೋದು...slate ಒರೆಸೋದಕ್ಕೆ ನೀರು ದಂಟು ಹುಡ್ಕೊಂಡು ಹೋಗೋದು...ದಾಲ್ಚಿನಿ ಸೊಪ್ಪು ತಿನ್ನೋದು...ಹೀಗೆ ಒಂದ ಎರಡಾ....ಮತ್ತೆ ಮನೆಗ ಬಂದು ಬೆಂಕಿ ಕಾಸೋದು ಆಹಾ...ಏನ್ ಮಜಾ...ಹಲಸಿನ ಬೀಜ ಸುಡೋದು...ನಂಗೆ ಜಾಸ್ತಿ ಬೇಕು ಅಂತಾ ತಕರಾರು ಬೇರೆ.....ಗೇರು ಬೀಜ ಸುಟ್ಟು ತಿನ್ನೋದು...ಬಾಳೆಹಣ್ಣು ಸುಟ್ಟು ತಿನ್ನೋದು...ಆಹಾ ..ಹ್ಮ್ಮ್ಮ್ ಬಾಯಲ್ಲಿ ನೀರು ಬರತ್ತೆ....ಈಗ super marketಗೆ ಹೋದ್ರೆ ಏನ್ ಬೇಕೋ ಸಿಗತ್ತೆ... ಬೇಕಾದ್ರೆ oven ಅಲ್ಲಿ ಇಟ್ಟು ತಿನ್ನ್ಬೇಕಷ್ಟೇ...ಆದ್ರೆ ಅಪ್ಪನೋ ಅಮ್ಮನೋ ಬಿಸಿ ಇರೋದನ್ನ ಆರಿಸಿ ನಮ್ಮ ಎಳೆಯ ಕೈಗೆ ಬಿಸಿ ತಾಗದಂತೆ ತಿನ್ನೋಕೆ ಕೊಡ್ತಿದ್ದಿದ್ದು...ಆ ಪ್ರೀತಿ ಕಾಳಜಿ ಯಾವ super marketಅಲ್ಲಾದ್ರೂ ಸಿಗತ್ತಾ....
ನಮ್ದಂತು ಹಳ್ಳಿ ಮನೆ ಹಾಗಾಗಿ ಕರೆಂಟ್ ಇರೋದು ಕನಸಿನ ಮಾತು....ನಮಗೆ TV radio ಎಲ್ಲ ನಮ್ಮ್ ದೊಡ್ದಪ್ಪನ ಕಥೆನೇ...ಭಸ್ಮಾಸುರ ಮೋಹಿನಿ ಕಥೆ ಅಂತು ನನ್ನ್ fav. ಕಥೆ....ಹಾಗೆ ಕಥೆ ಕೇಳ್ತಾ ಕೇಳ್ತಾ ಮಲಗಿದ್ದು....ನೆನಪು ಎಷ್ಟು ಚಂದ ಅಲ್ವಾ...

ಹ್ಮಂ ಹೀಗೆ ನೆನಪಿನ ಮಳೇಲಿ ತೊಯ್ತ ಇದ್ದೊಳನ್ನ ring ಆಗ್ತಿದ್ದ mobile ವಾಸ್ತವಕ್ಕೆ ಎಳ್ಕೊಂಡು ಬಂತು....ಅರೇ ಏನು ಆಶ್ಚರ್ಯ...ಅಣ್ಣ call ಮಾಡ್ತಿದ್ದಿದ್ದು...ಏನೋ ಮಾರಾಯ ಚೌತಿ ಹಬ್ಬಕ್ಕಾದ್ರೂ ಬಾರೋ..ಕೂತ್ಕೊಂಡು ಕಥೆ ಹೊಡಿದೆ ಎಷ್ಟೊಂದು ದಿನ ಆಗೋಯ್ತು..ಅಂತಾ ನಾ ಹೇಳ್ತಿದ್ದ್ರೆ ಅಣ್ಣ ತಗ್ಗಿದ ಧ್ವನಿಲಿ ಈ ಸಾರಿನೂ ಊರಿಗೆ ಬರೋಕಾಗಲ್ಲ ಕಣೆ ರಜೆ ಇಲ್ಲವೆ ಅಂತಾ ಹೇಳಿದ್ದ...

ದೊಡ್ದೊರಾಗೋದು ಅಂದ್ರೆ ಇದೇನಾ...ಅಂದು ಕೈ ಕೈ ಹಿಡ್ಕೊಂಡಿದ್ದ್ವಿ...ಕನಸು ಕಣ್ಣಲ್ಲಿತ್ತು..ಇಂದು...ಕನಸು ನನಸಾಗಿದೆ..ಆದ್ರೆ ಕೈ ತಪ್ಪಿ ಹೋಗಿದೆ....ಜೊತೆ ಜೊತೆಯಲ್ಲೇ ತಿರ್ಗಾಡ್ತಿದ್ದ ನಮ್ಮ ನಡುವೆ ಈಗ ಸಾಗರಗಳ ಅಂತರ.....ಅಂತರಂಗದ ಬೇಸರ ಸಾಗರದಷ್ಟೇ ಆಳ....

ಮತ್ತೆ ಭೇಟಿ ಯಾವಾಗಲೋ....ಜೀವನ ಅಂದ್ರೆ ಹೀಗೆ ಅನ್ಸತ್ತೆ ಅಲ್ವಾ....ಊರಲ್ಲಿ ಅದೇ ಪುಟಾಣಿ ಬೆಚ್ಚಗಿನ ಗೂಡು...ಜೋರು ಮಳೆ...ಏನೂ ಬದಲಾಗಿಲ್ಲ....
ಈಗ ಶಾಲೆಗೇ ಹೋದ್ರೆ ಅದೇ ಖಾಲಿ corridor...once upon a time ನಾವು ಆಟ ಆಡಿದ play ground.ಸುತ್ಲೂ ಕಂಗೊಳಿಸೋ ಹಸಿರು..ಎಲ್ಲಾ ಹಾಗೇ ಇದೆ...ನಮ್ಮ ನಡುವಿನ ಪ್ರೀತಿ..ಅದೂ ಹಾಗೆ ಇದೆ....ಹಾಗಾದ್ರೆ ಬದಲಾಗಿದ್ದು.....ಕಾಲ ಮಾತ್ರ....
ಸವಿ ಸವಿ ನೆನಪು.....ಕಣ್ಣಂಚಲ್ಲಿ...ಕಣ್ಣೀರ ನೆನಪು...ಅಂತಾ ಹಾಡು ಗುನುಗುತ್ತಿದ್ದೋಳಿಗೆ ಯಾಕೋ ವಾಸ್ತವ ಬೇಡ ಅನ್ನಿಸ್ತು....

ಬಂದೆನೇ ಸುಮ್ಮನೆ....

2010-07-31T08:39:00.000-07:00

ಪುಟ್ಟ ಹೆಣ್ಣು ಮಗುವಿನ ನೋವು......

ನವಮಾಸಗಳ ಕೊನೆಯವರೆಗೂ
ಅಮ್ಮನೊಡಲೇ ಎನ್ನ ಅಂಗಳ
ಅ ವಾತ್ಸಲ್ಯಮಯ ಪ್ರತಿ ಉಸಿರಲಿ
ಕಂಡೆ ನಾ ಪ್ರೀತಿಯ ಬೆಳದಿಂಗಳ

ಅವಳ ನಡಿಗೆಯೇ ಎನಗೆ ಉಯ್ಯಾಲೆ ಆಟ
ಅವಳು ತಿಂದಾ ತುತ್ತೇ ಅಮೃತದ ಊಟ
ಲಯಬದ್ಧ ಎದೆಬಡಿತವೆ ನಿತ್ಯ ಲಾಲಿ
ಹೀಗೆ ಸುಖದಲಿ ಇದ್ದೆ ಎಲ್ಲ ಎಲ್ಲೆಯ ಮೀರಿ

ಅಮ್ಮನ ಆ ಆಕ್ರಂದನ ನನ್ನ ಎಚ್ಚರಿಸಿತ್ತು
ನಾ ಏ ಭುವಿಗೆ ಬರುವ ಸಮಯ ಬಂದಿತ್ತು
ಆ ದೈವಕೆ ನೋವಿತ್ತ ಬೇಸರದಿ ನಾ ಅತ್ತೆ
ಸುಖವ ಕಳೆದುಕೊಂಡು ನಿಜದಿ ನಾ ಬೇಸತ್ತೆ

ಎಲ್ಲರ ಮಡಿಲೊಳಗೆ ಮುದ್ದು ಕೂಸಾಗಬಯಸಿದ್ದೆ
‘ಅಯ್ಯೋ ಹೆಣ್ಣೇ ‘ಎಂಬ ಉದ್ಗಾರದಿ ನಾ ಪಾತಾಳಕ್ಕಿಳಿದಿದ್ದೆ
ನಾ ಹೆಣ್ಣಾದುದರಲಿ ಯಾರ ತಪ್ಪಿಹುದು?
ನನದೆ?ನನ್ನವ್ವನದೇ?ಸೂತ್ರಧಾರ ಆ ಭಗವಂತನದೇ?

ನನ್ನ ದೈವದಾ ನೋವ ನಾ ನೋಡಲಾರೆ
ಎಲ್ಲರಾ ತಿರಸ್ಕಾರ ನಾ ಸಹಿಸಲಾರೆ
ನೀ ನೀಡಿದ ಜನ್ಮ ನಿನಗೇ ಇರಲಿ ದೇವಾ
ಹೆಣ್ಣಾಗಿ ಹುಟ್ಟಿದ್ದಕ್ಕೆ ನಾ ತೊರೆಯುವೆ ಈ ಜೀವ

ಕಣ್ಣೊಳಗಿನ ತಾಯಿಯ ಆ ರೂಪ ಕರಗುತ್ತಿದೆ
ಒಡಲಾಳದ ನೋವಿಗೆ ಜೀವಜಲ ಇಂಗುತಿದೆ
ಮತ್ತೆ ಕತ್ತಲಿನೆಡೆಗೆ ಹೊರಡುವಾ ಮನಸಾಗಿದೆ
ನಾ ಹೋಗುವೆ ತಿರುಗಿ ಬಾರದೆಡೆಗೆ

ತಪ್ಪಿಲ್ಲದಾ ಜೀವ ನಿರ್ಜೀವವಾಯಿತು
ಸದ್ದಿಲ್ಲದ ಮನೆಬೆಳಕು ಆರಿಹೋಯಿತು

M@N@SU

2010-07-28T09:34:00.000-07:00

ಮನವೆಂಬ operating system
ಯಾಕೋ ಮಂಕಾಗಿದೆ
ತುಂಬಿಕೊಂಡ errorಗಳ
debug ಮಾಡಲಾಗದೆ

ಛಲ ಬಲಗಳ ಜೊತೆಗೆ
ಖಚಿತವಿತ್ತು ಆ destination
ಇಂದೇಕೋ ಸರಿಹೊಂದುತ್ತಿಲ್ಲ
ಮನಸಿನ ಬುದ್ಧಿಯ combination

ಏನಿರಬಹುದು
ಆ ದೇವನಾ logic
ಹಣೆಬರಹದ software
ಅದುವೆ ಅರ್ಥವಾಗದ topic

ಸಂಬಂಧಗಳ linked list ನ
link ತಪ್ಪಿಹೊಯಿತೆ?
ಕಾಡುವಾ ಭಾವನೆಗಳು
infinite loop ಆಯಿತೆ?

ಸದ್ಗುಣಗಳ inherit ಮಾಡಲು
ಎಲ್ಲರೊಂದಿಗೆ ಗುದ್ದಾಟ
ಖಾಲಿಯಾದ ಮನದೊಳಗೆ
garbage valueವಿನ ಕಾಟ

ನನ್ನ ಏಳ್ಗೆಗೆ ನಾನೇ ಬರೆವೆ
algorithm ಅನ್ನು
ಸಂಸ್ಕಾರದಿ compile ಮಾಡಿ
execute ಮಾಡುವೆ ಬದುಕೆಂಬ programಅನ್ನು..

ಬದಲಾದ ಚಂಚಲತೆಯ ಚಿಟ್ಟೆ....just for you..

2010-07-28T07:24:00.000-07:00

ಹೀಗೆ ದಾರೀಲಿ walking ಹೊರಟಿದ್ದೆ.ಯಾಕೋ ತುಂಬಾ ನೆನಪಾದೆ ನೀನು..ಯಾಕಂತ ಗೊತ್ತಿಲ್ಲ.flashback ನಂಗೆ ಬೇಡ...past ಬಗ್ಗೆ ನೆನಪು ಮಾಡ್ಕೊಬಾರದು just present situations ನ enjoy ಮಾಡಬೇಕು ಅಂತ ಅನ್ಕೊಂಡಿದ್ದೆಲ್ಲ ಒಂದೇ ಕ್ಷಣದಲ್ಲಿ ಮಾಯ...ನಿಂಗೆ ಗೊತ್ತಲ್ವಾ ಮೊದ್ಲು ನಾ ಹೇಗಿದ್ದೆ ಅಂತಾ...ಎಲ್ಲರೂ ಒಳ್ಳೇವ್ರು ಅಂತಿದ್ದೆ.ಎಲ್ಲರನ್ನು ಮುಗ್ಧವಾಗಿ ನಂಬ್ತಿದ್ದೆ.ನಂಬೋದೇ ತಪ್ಪು ಅಂತಾ ಬದುಕು ಕಲಿಸ್ಬಿಡ್ತು.
'ಹೇಳಿ ಹೋಗು ಕಾರಣ' book ಓದಿ ನಾ ನಿಂಗೆ ಕೇಳಿದ್ದೆ ನೆನಪಿದ್ಯಾ? ಯಾರಾದ್ರೂ ಇಷ್ಟೆಲ್ಲಾ ಬದಲಾಗೋಕೆ ಸಾಧ್ಯಾನಾ ಅಂತಾ...ಆ ಕ್ಷಣದಲ್ಲಿ ನಂಬೋಕಾಗಿರ್ಲಿಲ್ಲ.but ಹೀಗೂ ಇರ್ತಾರೆ ಅನ್ನೋ ಸತ್ಯ ಈಗ ಗೊತ್ತಾಯ್ತು.ಎಂಥ ಪ್ರಪಂಚ ಇದು...ಮುಗ್ಧ ಮನಸ್ಸು ಅರಳೋ ಮುನ್ನನೇ ಕೊಂದುಬಿಡತ್ತೆ.ಸುಳ್ಳಿನ ಅರಮನೆ ಕಟ್ಟಿ ಸುಖವಾಗಿದ್ದಿಯಾ ನೀನು.ಸತ್ಯಾನೆ ನಂಬಿರೋ ಈ ಬಡಪಾಯಿ ಮಾತು comedy ಅನ್ಸತ್ತೇನೋ ಅಲ್ವಾ...ಯಾಕೋ ಬಿಟ್ಟು ಹೊದೋರ್ನೆಲ್ಲ ಪೂರ್ಣವಾಗಿ ದ್ವೇಷಿಸಬೇಕು ಅನಿಸಿದ್ದಂತು ನಿಜ..ಆದ್ರೆ ಅದೂ ಬರ್ದೇ ಒದ್ದಾಡೋ ಪರಿಸ್ಥಿತಿ ನಂದು.ವಂಚನೆ ಮಾಡಿದೋರ ಕಣ್ಣನ್ನ ಅದೇ ಮುಗ್ಧ ಪ್ರೀತಿ ಇಂದ ನೋಡಿದ್ರೆ ಎಂಥ ವಂಚಕರಿಗಾದ್ರು guilt ಕಾಡತ್ತಂತೆ.ನಂಗೆ ನಿನ್ನ ಆ guilt feel ಬೇಡ.ಮೊದಲು ತುತ್ತು ಮೊದಲ ಪ್ರಾರ್ಥನೆ ಎರಡೂ ನನ್ನ ಪ್ರೀತಿಪಾತ್ರರಿಗೆ ಅಂತ ಹೇಳ್ತಿದ್ದ ನಂಗೆ ಈಗ ಎರಡೂ ಬೇಡ ಅಂತಾ ಅನ್ನಿಸ್ತಿದೆ.ಸುಮ್ಮನೆ ಸದ್ದಿಲ್ಲದೇ ಬದಲಾದ್ಯಲ್ಲ ನಿಂಗೂ ಹಾಗೆ ಅನ್ನಿಸ್ತಾ ಇದ್ಯಾ?ಗೊತ್ತಿಲ್ಲ..ನೀನು ಹಾರೋ ಕನಸು ಕಂಡೆ.ಹಾರೋದಿಕ್ಕೆ ನಿನಗೆ ನನ್ನ ರೆಕ್ಕೆ ಕೊಟ್ಟೆ.ಹಾರೋದಿಕ್ಕೆ ಕಲಿಸಿದೆ.ನೀ ಹಾರ್ತಾ ಹೋಗ್ಬಿಟ್ಟೆ .ಆದ್ರೆ ನಾ ಇಲ್ಲೇ ಉಳಿದ್ಬಿಟ್ಟೆ sorry ನಾನೇನು ನಿಂಗೆ ಬೈತಿಲ್ಲ ನಂಗೊತ್ತು ನಿನ್ನ್ ಬದುಕು ನಿನ್ನ್ ಇಷ್ಟ.ನಾ ನಿಂಗೆ ಏನು ಅಲ್ವಾ?ನಾವು firends ಹಾಗೆ ಹೀಗೆ...ಕೊನೆವರ್ಗು ಹೀಗೆ friends ಅಂತೆಲ್ಲ ಹೇಳ್ತಿದ್ದ್ಯಲ್ಲ...ಹ್ಮ್ ಹೋಗ್ಲಿ ಬಿಡು...ಆದ್ರೆ ನೀ ನನ್ನ ಮತ್ತೆ ಭೇಟಿ ಅಗೊದಿರ್ಲಿ ನನ್ನ ನೋಡ್ಲೂಬೇಡ please...ಮೊದಲಾದ್ರೆ ಅ ನೋಟದಲ್ಲಿ ಪವಿತ್ರ ಸ್ನೇಹ ಇತ್ತು...ಈಗ... ವಂಚನೆಯ ಎರಡನೇ ಅಧ್ಯಾಯ ಅನ್ಸುತ್ತೆ ನಂಗೆ.ನಿನ್ನ ಬದಲಾದ ಬದುಕಲ್ಲಿ ಆ ವಂಚನೆಯ ಪಂಜರದ ಪುಟ್ಟ ಹಕ್ಕಿ ಆಗೋದು ನಂಗೆ ಇಷ್ಟ ಇಲ್ಲ...ಗೂಬೆ ತರಾ ಒಂಟಿ ಆಗಿ ಇದ್ದರು ಪರವಾಗಿಲ್ಲ...ಒಳಿತೋ ಕೆಡುಕೋ ಜೊತೆಲೇ ಇರೋ ಬಳ್ಳಿ ಬೇಕು...ನಿನ್ನಂತ ವಸಂತದ ಕೋಗಿಲೆ ಬೇಡ.ಎಲ್ಲೇ ಇದ್ರೂ ನೀ ನಗ್ತಾ ಇರು ನನ್ನ ಕಣ್ಣೀರು ಒರೆಸೋಕೆ try ಮಾಡಬೇಡ.ಒಂಟಿತನದ ಶಾಪ ನಿಂಗೆ ಅಂಟೀತು .ಏನೇನೋ ಮಾತಾಡಿದ್ನಾ...ಬದಲಾದ ನಿನ್ನಂತೋರು ಇಂತ ಮಾತು ಕೇಳಲೇಬೇಕು....ಹೀಗೆ ಯಾರನ್ನೂ ಕಳ್ಕೊಬೇಡ...ಹೋಗಿಬರ್ತೀನಿ..sorry..ಹೋಗ್ತೀನಿ.bye...

ನಮ್ಮ್ ಹಾಸ್ಟೆಲ್ ಜೀವನ

2010-07-28T01:42:00.000-07:00

ಓದಿಗಾಗಿ ಕೆಲವೊಮ್ಮೆ ಹಾಸ್ಟೆಲ್ ವಾಸ ಅನಿವಾರ್ಯ....ಅಲ್ಲಿನ ಅನುಭವದ ಪುಟ್ಟ ಪರಿಚಯ ಇಲ್ಲಿದೆ...

ಬಣ್ಣ ಬಣ್ಣದ ಕನಸು
ಪಕ್ವವಾಗದ ಮನಸು
ಮನೆಯಿಂದ ನನ್ನನ್ನು
ಕಳುಹಿದಕೆ ಮುನಿಸು

ಮನೆಯವರು ಹೊರಟಾಗ
ಅವರತ್ತ ಕೈ ಬೀಸುವಾಗ
ಮನದೊಳಗೆ ಕೋಲಾಹಲ
ನಿರ್ಧಾರಗಳು ಚಂಚಲ

ಮುಸ್ಸಂಜೆಯಲಿ ಮನೆನೆನಪು
ಬೆಂಬಿಡದೆ ಕಾಡುತಿರೆ
ಮನದ ಭಾರಕೋ ಏನೋ
ಸೊಗಸಾದ ನಿದ್ರೆ

ಬೆಳಗೆದ್ದು ಕುಳಿತಾಗ
ಕಣ್ಣಂಚಲಿ ಕೆನೆಗಟ್ಟಿದ ನಿದ್ದೆ
ಅಯ್ಯಯ್ಯೋ ಹೊತ್ತಾಯ್ತೆಂದು
ತರಗತಿಗೆ ಓಡಿದ್ದೆ

ಕಾಲ ಕಳೆದಾ ಹಾಗೆ
ಗೆಳೆಯರಾ ದಂಡಾಯ್ತು
ಮೆಲ್ಲಮೆಲ್ಲನೆ
ಮನೆನೆನಪು ಮರೆಯಾಯ್ತು

ಸೇರದಾ ಊಟ
ಕೆಲವರಾ ಕಾಟ
ಇದ್ದರೂ ಕೂಡ
ಮುಗಿಯದು ನಮ್ಮ ತುಂಟಾಟ

ಒಂದು ತುತ್ತಿಗೆ
ಹತ್ತೆಂಟು ಕೈಗಳು
ಒಂಟಿಜೀವಕೆ ಜೊತೆಯಾದ
ಹಲವಾರು ಮನಗಳು

ದೂರವಿದ್ದರು ನಮಗೆ
ಇಲ್ಲಿಲ್ಲ ಚಿಂತೆ
ನಮ್ಮಂಥವರಿಗೆ
ಸ್ನೇಹಿತರೇ ಬದುಕಂತೆ

ಮುತ್ತಂಥ ಮುಜಾನೇ
ನೆನೆಪಲಿ ಕಳೆದಾ ಹಗಲು
ಹಸಿದು ಕಳೆದ ರಾತ್ರಿ
ಜೊತೆಗೆ ಮತ್ತದೇ ಹರಟೆ

ಹಣವಂತರು ನಾವಲ್ಲ
ಗುಣಕೇನು ಕಮ್ಮಿ ಇಲ್ಲ
ಧನವಿಲ್ಲದಿರೆ ಏಕೆ ಭೀತಿ
ನಮ್ಮ ನಡುವಿಹುದು ಮುಗ್ಧ ಪ್ರೀತಿ

ಇಲ್ಲಿ ನಮಗೆ ನಾವೇ ಎಲ್ಲ
ಬೇರೇನೂ ಬೇಕಿಲ್ಲ
‘ನಾನು ಒಂಟಿ’ ಎಂಬ ಬೇಸರವಿಲ್ಲ
‘ನಾವು’ ಎಂಬ ಖುಷಿ ಸಾಕಲ್ಲ....

ಸಾಕ್ಷಿ

2010-07-27T05:29:00.000-07:00

ಎಳೆ ಮನಸಿನ ಹೊಂಗನಸಿಗೆ
ನಸುನಗುವಿನ ಸಾಕ್ಷಿ
ಬಿಸಿನೆತ್ತರ ಹಸಿಮನಸಿಗೆ
ಹುಸಿಮುನಿಸಿನ ಸಾಕ್ಷಿ

ಚೆಲ್ಲಾಟದ ಚೆಲ್ಲು ಮನಸಿಗೆ
ತುಂಟಾಟದ ಸಾಕ್ಷಿ
ಪ್ರೀತಿಸುವ ಪೆದ್ದು ಮನಸಿಗೆ
ಪಿಸುಮಾತಿನ ಸಾಕ್ಷಿ

ಛಲವಿರುವಾ ದೃಢಮನಸಿಗೆ
ಕಣ್ಹೊಳಪೇ ಸಾಕ್ಷಿ
ಸಾಧಿಸಿದ ದಿವ್ಯ ಮನಕೆ
ಧನ್ಯತೆಯೇ ಸಾಕ್ಷಿ

ಪೂಜಿಸುವಾ ಪೂಜ್ಯ ಮನಕೆ
ಪ್ರೌಢಿಮೆಯೇ ಸಾಕ್ಷಿ
ಏನೂ ಅರಿಯದ ಮುದ್ದು ಮನಕೆ
ಮುಗ್ಧತೆಯೇ ಸಾಕ್ಷಿ

ಪುಟ್ಟ ಹಣತೆ

2010-07-27T05:26:00.000-07:00

ಜಗವ ಬೆಳಗುವ ಸೂರ್ಯ ನಾನಲ್ಲ
ಮನೆ ಮನವಬೆಳಗುವ ಪುಟ್ಟ ಹಣತೆ
ನನ್ನಿಂದ ಬೆಳಕ ಪಡೆವರು ಎಲ್ಲ
ಆದರೆ ಎನ್ನ ಆತ್ಮಕೆ ಬೆಳಕಿನ ಕೊರತೆ...

ದಿಟ್ಟಿಸಿ ನೋಡು ...
ಎನ್ನ ಮನದಂಗಳ ಕತ್ತಲು
ಆದರೂ ಜಗಕೆ ನಾ ಬೆಳಕಿನ ಬಟ್ಟಲು

ನನ್ನ ಜೀವವ ಉರಿಸಿ ಬೆಳಕ ತೋರುವೆ ನಿಮಗೆ
ನಿಮ್ಮ ಗುರಿಗೆ ನಾ ದಾರಿದೀಪ
ಎಂದೆಂದೂ ಹಿಂದಿರುಗಿ ನೋಡದಿರಿ ನನ್ನನು..
ಹೇಗೆ ನಾ ತೋರಲಿ ಈ ಸುಟ್ಟ ಬದುಕನ್ನು...

ಹೆಜ್ಜೆ....

2010-07-27T04:33:00.000-07:00

ಮರಳಿನೊಳಗಿನ ಹೆಜ್ಜೆ
ಮರಳಿ ಬಾರದ ಕಡೆಗೆ
ಹೊರಟಿರುವೆ ಜಾಡು ಹುಡುಕಿ
ಮತ್ತೆ ಆ ಅಮೂರ್ತ ಗಮ್ಯದೆಡೆಗೆ

ಬದುಕ ಬಗೆಗಿನ ಬಯಕೆ
ಮರಳ ಮೇಲಿನ ಮರೀಚಿಕೆ
ಮನಸಿನೊಳಗಿನ ಮೋಹ..
ಅದುವೆ ತೀರದ ದಾಹ..

ಅಪ್ಪಳಿಸುತಿದೆ ಅಲ್ಲಿ ನೆನಪಿನಾ ಅಲೆಗಳು
ಅಬ್ಬರದ ಭೋರ್ಗರೆತಕೆ ತತ್ತರಿಪ ಕಿವಿಗಳು
ಆದರೂ ಏಕಿಷ್ಟು ಪ್ರೀತಿ ಆ ಏಕಾಂತದ ನಡಿಗೆ
ಜೊತೆ ಸಿಕ್ಕೀತು ಎಂಬ ಕಲ್ಪನೆಯೆಡೆಗೆ..
.
ಕಾದ ಮರಳಿನಲ್ಲಿ ಪಾದ ಬೇಯುತಿದೆ
ಕಳೆದುಹೋದವರ ಬಗೆಗೆ ಮನಸು ನೋಯುತ್ತಿದೆ
ಆವನಿಯ ಅಂತ್ಯ ಬಂದೀತೆ....
ಮರುಳಾದ ಮನವು ಮರಳು ಸೇರುವವರೆಗೂ
ಮರಳಿ ಬಾರದ ಕಡೆಗೆ ಈ ಪಯಣ...

ಅನಾಥೆ

2010-07-26T00:47:00.000-07:00

ಅಚ್ಚಹಸಿರಿನ ಮುಚ್ಚು ಮರೆಯಲಿ
ಹುಚ್ಚು ಮಳೆಯು ಹೆಚ್ಚು ಬರಲು
ಬೆಚ್ಚಗಿದ್ದ ಹಕ್ಕಿ ಮರಿಯು
ಮನವ ಬಿಚ್ಚಿ ತೋರಿತು

ನಸುಕಿನಾ ಬೆಳಗಲ್ಲಿ
ಮಸುಕಾದವೇ ನೆನಪುಗಳು
ಉಸುಕಿನಾ ಗೂಡಲ್ಲಿ
ಹೊಸಕಿ ಹೋದವೇ ಕನಸುಗಳು

ಕಂಡೆ ನಾ ಕನಸುಗಳ
ಜಗವ ಕಾಣುವ ಮೊದಲು
ಹಾರುವಾ ಆಸೆಯು
ರೆಕ್ಕೆ ಬಲಿಯುವ ಮೊದಲು

ಬದುಕಲು ಬೇಕು ಛಲ
ಜೊತೆಗಿರಲಿ ಆತ್ಮಬಲ
ಎಂದು ಹೇಳಿದ್ದಳು ಮಾತು
ತಾಯಿಯು ಜೊತೆ ಕೂತು

ರಿಂಗಣಿಸುತಿವೆ ತಾಯಿಯ
ಆ ಪ್ರೀತಿಯ ನುಡಿಮುತ್ತು
ಏನ ಮಾಡಲಿ ನಾನು
ಅವಳಿಲ್ಲ ಈ ಹೊತ್ತು

ಎನ್ನುದರ ಪೋಷಣೆಗೆ
ಬಲಿಯಾಯಿತೆ ಮಾತೆಯ ಬಲ
ಸೇರಿದಳೆ ಭುವಿಯೊಡಲ
ನಾ ಹೇಗೆ ಮರೆಯಲೇ ಆ ಮಡಿಲ..

ಏನ ಮಾಡಿದರೇನೆ..ಗೆಳತಿ
ಯಾರು ಜೋತೆಗಿದ್ದರೇನೆ
ತಾಯಿಯಿಲ್ಲದ ಮೇಲೆ
ಅನಾಥೆ ತಾನೇ...

ಅಮ್ಮಾ.....ಎಲ್ಲಿ ಹೋದೆ.....?

2010-07-25T10:23:00.000-07:00

(ಅಮ್ಮನ ಕಳೆದುಕೊಂಡ ಮುಗ್ಧ ಮಗುವಿನ ತೊದಲು )

ಅಮ್ಮಾ...'ಅಮ್ಮ' ಅಂತಾರಾ ನಿಂಗೆ?ನಂಗೆ ಗೊತ್ತಿಲ್ಲ.ಅದ್ನೂ ನೀನೆ ಹೇಳಿಕೊಟ್ಟೆ...ನಿಜವಾಗಲೂ ಅನಿಸುತ್ತಿದೆ..ನಿನ್ ಹೊಟ್ಟೆಲಿ ನಾ ಬೆಳೆದಿದ್ದು ನನ್ನ ಪುಣ್ಯನೋ ನಿನ್ ಕರ್ಮನೋ ಗೊತಾಗ್ತಿಲ್ಲ..ಎಷ್ಟೊಂದು ಜವಾಬ್ದಾರಿ ನಿಂಗೆ..ಹುಟ್ಟಿಂದನೂ ಬರಿ ಕಷ್ಟ ಕಂಡಿದ್ದಂತೆ ನೀನು,ಅಲ್ವಾ?ಅಜ್ಜಿ ನಿನ್ನ್ ಹತ್ರ ಹೇಳಿದ್ದನ್ನ ನಾ ಕೇಳಿಸ್ಕೊಂಡೆ.ಏ ಬೈಬೇಡ ನಾನು ಆಗ ನಿನ್ನ ಹೊಟ್ಟೆಲಿದ್ದೆ.ಹ್ಮ್ಮ್ಮ್ ಗಂಡ ಮುಂಗೋಪಿ,ಮನೇಲಿ ಕಷ್ಠ,ಆದರೂ ನೀನ್ನು ಹೆಂಗೋ ಕಷ್ಟಪಟ್ಟು ಬದುಕನ್ನ ಕಟ್ಟಿದ್ದೆ.ಹರಿದು ಹೋದ ಬಾಳಿಗೆ ಗೊತ್ತಾಗದಷ್ಟು ನಾಜೂಕಾಗಿ ನಗುವಿನ ತೇಪೆ ಹಾಕಿದ್ದೆ...ನಾ ಹುಟ್ಟಿದಾಗನೂ ಅಷ್ಟೇ ಅಲ್ವಾ ಆ ದೇವ್ರು ನಂಗೆ ಅನ್ನೋದ್ಕಿಂತ ನಿಂಗೆ ಅನ್ಯಾಯ ಮಾಡಿದ್ದ.ನನ್ನಂತ ಬುಧ್ಧಿಮಾಂದ್ಯ ಮಗುನ ನಿನ್ನ ಮಡಿಲಿಗೆ ಹಾಕಿ....
ನೋವಾದ್ರೆ ಅಳಬೇಕು ಅಂತನೂ ಗೊತ್ತಾಗದ ಮಗು ನಾನು...ಆದ್ರೆ ಅಮ್ಮ ನಿನ್ನ ಕಣ್ಣಂಚಿನ ಕಣ್ಣೀರು ನಂಗೆ ಹಠ ಕಲ್ಸಿತ್ತು.ಕಷ್ಟಪಟ್ಟೆ.ನೀನ್ಯಾರು ಅಮ್ಮ ಅಮ್ಮ ಅಮ್ಮ...ಹತ್ತಲ್ಲ ನೂರಲ್ಲ ಸಾವಿರ ಸಾರಿ ನೆನಪಿಟ್ಟೆ....ಯಾಕಂದ್ರೆ ನಾ ನಿನ್ನ ಹಾಗೆ ಕರೆದರೆ ನೀ ನಗ್ತಿದ್ದೆ.ಅ ನಿನ್ನ ನಗುವಿನಲ್ಲಿ ನನ್ನ ಬದುಕಿನ ಬೆಳಕಿತ್ತು.....ಆದ್ರೆ....ಈಗ ಯಾಕಮ್ಮ ಮಂಕಾದೆ...?ಮಾತೂ ಆಡ್ತಿಲ್ಲ.ನೋವು ಕಳೆಯಲು ಹರಿಸಿದ ಕಣ್ಣೀರ ಜೊತೆ ಜೀವಜಲವೂ ಹರಿದುಹೋಯ್ತಾ?ದೊಡ್ದೊರೆಲ್ಲಾ ಏನೇನೋ ಹೇಳ್ತಿದಾರೆ.ನಾ ಪಾಪ ಅಂತೆ..ನೀ ಇರಬೇಕಾದ್ರೆ ನಾ ಯಾಕಮ್ಮ ಪಾಪ....ಅಮ್ಮ ಯಾಕಮ್ಮ ನಿನ್ನ್ ದೇಹ ತಣ್ಣಗಾಗಿಹೋಗಿದೆ?ನೀ ಯಾಕೆ ನನ್ನ ನೋಡ್ತಿಲ್ಲ?ನಿನಗ್ಯಾಕೆ ಪೂಜೆ ಮಾಡ್ತಿದಾರೆ?ಅಪ್ಪ ಹೇಳ್ತಿದಾರೆ ನೀ ದೇವ್ರ ಹತ್ರ ಹೊದ್ಯಂತೆ.....ನಂಗೆ ಏನೂ ಗೊತ್ತಾಗ್ತಿಲ್ಲ.....
ಈ ಭಾಗ್ಯಕ್ಕೆ ನಾನ್ಯಾಕೆ ಇಲ್ಲಿಗೆ ಬಂದೆ..ಹೌದು ನಾನ್ಯಾರು?

ಸ್ನೇಹಿತರು

2010-07-25T08:54:00.000-07:00

ಸಂತಸದ ಕ್ಷಣಗಳು ಎಂದೂ ಹೀಗೆ ಇರಲಿ
ಬದುಕ ಬಂಗಾರದ ಪುಟವು ಕೊನೆಗಾಣದಿರಲಿ..
ನಮ್ಮ ನಗುವಿಗೆ ಕೊನೆಯೆಲ್ಲಿ?
ಕಾಣ್ವ ಕನಸುಗಳಿಗೆ ಮಿತಿಯೆಲ್ಲಿ?
ಗುಂಪುಗೂಡಿದರೆ ಸಾಕು ಮತ್ತಷ್ಟು ಕಲರವವು,
ನಮ್ಮ ನಲಿವಿಗೆ ಇಲ್ಲಿ ಬೇಕಿಲ್ಲ ಕಾರಣವು.
ಗಮ್ಯವದು ದೂರವಿರೆ ನಮಗಿಲ್ಲ ಚಿಂತೆ..
ದಾರಿ ಸವೆಸಲು ಇಹುದು ಈ ಗೆಳೆಯರಾ ಸಂತೆ.
'ನಾ ನಡೆಯಲಾರೆ' ಎಂದು ನೊಂದು ನುಡಿದರೆ..
ಬೆಚ್ಚಗಿನ ಸ್ಪರ್ಶವದು ಹೇಳುವುದು 'ನಾ ಇಹೆನಲ್ಲ ಇನ್ನೇನು ತೊಂದರೆ?'
ಕಣ್ಣಲ್ಲೇ ಕವನ ಬರೆವ ಮಾಂತ್ರಿಕರು ನಾವು,
ಸ್ನೇಹದಾ ಕಡಲಿನ ಪುಟಿದೇಳುವ ಅಲೆಗಳು ..

ಆಸರೆಯೇ?ಚಿಲುಮೆಗಳೇ? ಚಿಗುರುಗಳೇ?
ಭರವಸೆಯೇ.....
ನಾವ್ಯಾರು????
ನಾವು "ಸ್ನೇಹಿತರು"...
-ಸೌರಭಾ